Leemiso Maxaafa 16

1Asi ba wozinan halchchees;

gido attiin zaaroy

GODAAPPE beettees.

2Asi biza oge ubbay

izas lo7o misatees;

GODAY koyro denththa qofaa

caddi xeellees.

3Ne ooththiza ubbaa hadara

GODAAS imma;

histtiko ne halchchoy polettana.

4GODAY ubbaa miish

medhdhida gaasoykka dees;

makkallanchchata gidikkoka

bashsha gallassas

giigsi woththides.

5GODAY otorettiza

ubbaa shaatettees;

istti qaxxayettontta attettenna.

6Siiqoninne ammaneteththan

nagaray atto geetettees;

GODAAS yashshateththan

asi iitappe haakkees.

7Asa hemetay

GODAA ufayssizaaz gidikko

iza morkketi

izara saro daana mala ooththees.

8Xilloteththan beettiza

guuththa miishshi

wordora demmiza

daro wodheppe aadhdhees.

9Asi ba wozinan

ba ooththana miish halchchees;

halchchozi GODAY giikko

polettees.

10Kawo metershati

Xoossafe ekkida maatan

haasayeettes;

iza inxarsi

pirda geellasanaas bessenna.

11Suure geeddaratinne

maka miishshati GODAAPPE;

karaxiite giddon diza geeddarati

ubbay iza oosota.

12Kawoti iita ooso harassetteettes;

ays giikko kawoteththa araatay

xilloteththan eqqees.

13Xillo haasayan kawoti ufayetteettes;

tuma haasayzaytakka doseettes.

14Kawo hanqoy

hayqo kiitanchcha mala;

aadho eranchchay gidikko

hanqo irxxisees.

15Kawoy pashki gishin de7oy dees;

izas kiyateththi

ira tookkida badhdhesa

shaara mala.

16Aadho erateththa demoy

worqqa demmizayssafe aadhdhees;

akeeka demoy

bira demoppeka aadhdhees.

17Suureta ogey iitatappe haakon dees;

ba hemeta naagiza asi

ba shemppo naagees.

18Otoro geedo bashshi kaallees;

hallaca geedokka

kundeththi kaallees.

19Otoranchchatara zuppetidi

di7i ehida miish

shaaketti ekkanaappe

manqotara manqeteththan

duussi kiya.

20Zore ekkiza asi duretees;

GODAAN ammanettiza asi

anjjettidaade.

21Wozinan aadho eranchcha gidida

asati akeekanchcha

geetetteettes;

lo7o qaalay erateth gujjees.

22Baas miish ooththidaades

akeekay de7o pultto;

dogatas gidikko

eeyateththi hanqo ehees.

23Aadho eranchcha wozinay

iza doona kaaleththees;

iza metershatikka

erateth gujji gujji beettes.

24Lo7o qaalay

eessa ililo mala mal7ees;

bollaka maaddeessinne

paththees.

25Asas suure misatiza ogey dees;

gido attiin wurseththan

hayqos gaththees.1

26Kaththa koshshi

asi minni ooththana mala

denththeththees;

gafaykka oosos minththeththees.

27Iita asi iitateth qoppees;

iza haasayaykka xuuggiza tama mala.

28Geella asi oosh denththees;

zigirsi ammanettiza

laggeta shaakkees.

29Gene asi ba shooroza cimmees;

lo7o gidontta oge

iza kaaleththees.

30Ayfera qim7oti bessiza asi

geellateth qoppees;

ba mettershaa saxxiza asi

iitaso bees.

31Pulunththi bonchcho kallachcha;

hessi xilloteththa

duussan beettees.

32Wolqqama as gidanaappe

dandaya as gideth lo7o;

bana haarizaadey

katama wolqqan

haarizaadefe aadhdhees.

33Asi saama yeggees;

gido attiin wurseththa polo

immizay GODAA.