Geeshsha Mexaafa
Leemiso Maxaafa 10
Solomoone Leemisota
Hayti Solomoone leemisota.
Aadho erateththi diza nay
ba aawa ufayssees;
gido attiin eeya nay
ba aayo ceecisees.
Bessontta ogera yida
aqotay go7enna;
gido attiin xilloteththi
hayqoppe ashshees.
GODAY xillota gafisenna;
gido attiin nagaranchchata
amo calqamissana.
Azallateththi manqisees;
minni oosoy gidikko duresees.
Aadho eranchchay
kath wodera shiishshees;
kath shiishshiza wode dhiskiza
asi gidikko kawuyees.
Xillo asi anjjettees;
iita asa doona
makkallateththi gordees.
Xillota sunththay
anjjon xeygettishe daana;
iitata sunththi gidikko dogettana.
Aadho eranchchay
azazo ero gi ekkees;
lom7ulom7iza eeyati gidikko
bashshaso beettes.
Suure asi hirgay baynda dees;
geella oge biza asi gidikko
ba mooron oykettana.
Gene oosos qim7otiza asi
meto ehees;
lom7ulom7iza eeyaykka
meto ehees.
Xillota haasayay de7o pultto;
iitata haasayay gidikko
makkallateth genththees.
Ixoy palama denththeththees;
siiqoy gidikko
bala ubbaa kammi aadhdhees.1
Wozinama asay
aadho eran haasayees;
eeya zokkon gidikko
xam7ay meqqees.
Aadho eranchchati
erateth dagaseettes;
eeya haasayay gidikko bash xeygees.
Dureta aqotay isttas
gimbettida katama;
manqota manqoteththi
isttas dhayoso.
Xillo asa damozay de7o;
iita asatas
wodhey gidikko qixaate.
Seera ekkiza asi
de7o ogen hemettees;
seera ixxiza asi gidikko
meto bolla wodhdhees.
Ixxishe ba ixxizayssa
qottiza asi wordanchcha;
zigirs zigirza
asi gidikko eeya.
Daro haasaya giddon
mooroy dhayenna;
ba doona shiishshi ekkiza
asi gidikko
aadho eranchcha.
Xillota haasayati
geeshsha bira mala;
iita asa qofas gidikko
go7ay deenna.
Xillota haasayay darota go7ees;
eeyati gidikko
ba wozina pacen hayqqeettes.
GODAA anjjoy dure kessees;
izi he dureteththan
meto gujjenna.
Eeya asi iita ooson ufayeettes;
wozinama asi gidikko
aadho erateththan ufayeettes.
Iita as hirgiza miish
iza bolla gakkana;
gido attiin xillo amoy
izas polettana.
Gote carkoy dendishin
iitati pitetti dhayana;
xilloti gidikko
mernaas minni daana.
Caalay ach zil7issiza malanne
cuway ayfe qohiza mala
azalla asi kiittidaadenttas
hessa mala.
GODAAS yashshi layth adussees;
iitata barey gidikko qaanththa.
Xillota hidotay ufayssan gaththees;
iitata hidotay gidikko
hada gidi attees.
GODAA ogey xillotas
baqati attizasoho;
iita ooththizaytas gidikko bashsha soho.
Xilloti mulekka dhoqallettettenna;
iitati gidikko biitta bolla
de7ettenna.
Xillota doonay
aadho erateth haasayees;
geellata inxarsi gidikko qanxxettana.
Xillota metershay
bessiza yo7o haasayees;
iita doonay gidikko
bokka yootees.
Source notes (1)
- Cross-reference Yaaqo 5:20; 1Phex 4:8
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.