Geeshsha Mexaafa
Taybo Maxaafa 34
Kanaane Dere Yuushon Diza Dereta
GODAY Muses hizgides, «Isra7eele asaa, ‹Tani inttes immiza Kanaane biittayo intte biidi geliza wode izi yuushon diza dereti hayssafe kaallizayta; dugeha baggara Xiine bazzofe dendidi Eedoome bazzo achchara kanththi biidi arshey mokkiza baggara Hayqo abbaafe dugeha bagga xeera bollara doommidi, Aqraabime purdera kanththi aadhdhidi Xiine gakkidi dugeha baggara Qaadeese Barine gakkees; hessafe Haxaare-Adaare kanththidi Aximoone gakkees. Aximooneppe doommidi haaththi baynda Gibxe shaafatara yuuyi aadhdhidi Mediteraane abbaan eqqees.
« ‹Arshey wulliza baggara Mediteraane abbay zawa gidana.
« ‹Pudeha baggara diza zaway Mediteraane abbafe biidi Uure zuma gakkees. Uure zumaappe biidi Hamaatera aadhdhi biidi Xedaade gakkees. Gede Zipiroone pinnidi Haxaare-Enaane gakki eqqees; hayssi ubbay inttes pudeha baggara diza zawa gidana.
« ‹Arshey mokkiza baggara Haxaare-Eenaneppe biidi Shafaame gakkanaas malata woththite. Zawazi Shafaameppe doommidi Ayineppe arshey mokkiza baggara Erebila kanththi aadhdhidi Galila abbaafe arshey mokkiza baggara diza zoozetara kanththidi, Yordaanoose shaafa wodhdhees; heera biidi wurseththazi Hayqo Abba1 gidana; hayti intte biittayo yuuyi aadhdhiza zawata gidana› gaada azaza.»
Musey Isra7eele asaa, «Saama yeggidi intte laattana mala uddufun zarkketassinne Minaase zarkkefe baggaytas he biittay imettana mala GODAY azazides. Oroobeele zarkketi Gaade zarkketinne Minaases bagga zarkketi baas imettida biittaa laattida. Isttika Yordaanooseppe he pinththan Iyarkko ginara arshey mokkiza baggara bana gakkiza xinxxoza ekkida» gi yootides.2
Biitta Gishanaas Doorettida Asata
GODAY Muses hizgides, «Qeese El7ezeereynne Nawe naa Iyaasoy gadeza derezas gishetto. Istti biittaa gishiza wode istta maaddanaas zarkkefe zarkkefe korapinne ekka. He ne ekkana asata sunththi hayssafe kaallizayssa; Yuhuda zarkkefe Yoofine naa Kaalebe, Simoona zarkkefe Amihuude naa Sameela, Biniyaame zarkkefe Kisaloone naa Eldaade, Daane zarkkefe Yogile naa Buuqa, Yooseefe zarkkefe Minaase bagga Sufide naa Han7eele, Yooseefe zarkkefe Efreeme bagga Shifixe naa Qamu7eele, Zaabiloone zarkkefe Perinaake naa Elxafaane, Yisakoore zarkkefe Hooza naa Palti7eele, Aaseere zarkkefe Seleeme naa Ahude, Niftaaleme zarkkefe Amihuude naa Pedaheele.» Haytanti Isra7eele asaas Kanaanen biittaa gishi immana mala GODAY doorida asata.
Source notes (2)
- Footnote Hayqo Abba: Hayqo Abba gizayssa issi issi Geeshsha Maxaafa birsheththati Maxine abba geettes.
- Cross-reference Iya 14:1-5
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.