Iyoobe Maxaafa 17

1«Ta ayanay daaburdes;

ta daana layththayka

polettanawu matides;

duufoykka tana naagees.

2Tana qidhizayti

tana yuuyi aadhdhida;

ta ayfeykka

istti ixxizayssa xeellees.

3Ta Xoossawu! Neeppe attiin

taas eqqanay haray deenna;

neni ne hu7era taas waase gida.

4Istti pilggidi

akeekanawu dandayontta mala

istta qofa gordadasa;

hessa gishshas istti

xoonana mala ooththofa.

5Miishshe demmanawu giidi

ba laggeza aaththi immiza

asa nayta

bolla gomey gakkana.

6«Xoossi tana asas

kaassa miish ooththides;

asay izaade bolla cuttiza

asa mala gidadis.

7Afunththafe dendidayssan

ta ayfeti doljumida;

kumeththa ta asateththayka

eesho mala gidides.

8Xillo asati hayssan dagamettida;

geeshshati Xoossa ammanontta

asata bolla hanqettida.

9Gido attiin xilloti tuma ogeppe

kare ke7ettenna;

geeshshati minoteththa bolla

minoteththi gujettees.

10«Intte ubbayka nam7anththo yiidi

ta sinththan marshettiko;

intte giddofe issi akeekara diza

as demmike.

11Ta layththay wurides;

ta qofaynne taas wozina amoy

hada gidi attides.

12Hayti ha asati

omarsa gallas geettes;

poo7oza qasse dhumana

hanees geettes.

13Hayssafe guye taas diza qaaday

duge hayqqida asati dizaso

duufon wodheththa;

yaan dhumason tani

ta hiixa ongana.

14Duufo, ‹Ta aawawu!›

gaada ta xeygana;

tana miza guxuneta tani,

‹Ta aayee, ta michcheyee!›

gaada xeygana.

15Histtiin taas ay hidotay dizee?

taas hidota gidiza miish

oonee taas xeellanay?

16Tani duge si7oole wodhishin

hidotay tanara issife wodhanee?

Issifekka duge duufon

nu gelanee?»