Geeshsha Mexaafa
Ermaasa Tinbite 47
Filisxeeme Gishshas Yootettida Kiita
Paarooney Gaaza oli oykkanaappe kase Filisxeemeta gishshas GODAAPPE Ermaasakko yida qaalay hayssafe kaalli dizayssa.1
GODAY, «Be7ite, pudeha baggan
haaththi kumi kumi bees;
wolqqama di7o gidana;
dereyonne izi giddon
dizayta ubbaa
izi katamatanne
katamatan diza
asaa ubbaa mittana.
Derezikka ba qaala
dhoqqu histti waassana;
he biittan diza asay ubbay
camo yeeho yeekkana.
Para toho giirissi
morkke para-gaareta waaso,
para-gaareta tohoy genderishe
giiriza giirissa gaason
aawati bantta nayta ashshanaas
guye simmi xeellettenna;
istta kusheykka sila gidana.
Filisxeeme asaa ubbaa dhayssanaas,
baas attidi harata maaddizayta
ubbaa Xirooseppenne
Sidoonappe duuththa ashshanaas
wodey gakkides.
GODAY Kaftoore gaxan
attida Filisxeeme asaa
dhayssana dendides.
Gaazay kayos
ba binana meedettana;
Asqeloonay ba doona bolla
kushe woththana;
intteno demba bolla
casha attidaytoo!
Intte ayde gakkanaas
intte bolla qaacishe daanee?
«Intte, ‹Nenoo GODA mashshawu!
Ne ayde shemppanee?
Ne koohon simma gela;
neni co7u gaada utta› gaana.
Gido attiin GODAY Asqeloonanne
abba gaxa olana mala azazishin
waani shemppanaas
dandayettizee?» gees.
Source notes (1)
- Cross-reference Isa 14:29-31; Hizi 25:15-17; Iyu 3:4-8; Amo 1:6-8; Sofo 2:4-7; Zaka 9:5-7
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.