Geeshsha Mexaafa
Isayaasa Tinbite 9
Sinththafe Kawotana Saroteththa Kawo
Ceecishe dizaytas hayssafe guyen hidotay dhayenna; beni wode Zaabiloone biittanne Niftaaleme biitta kawushshides; sinththafe yaana woden gidikko Mediteraane abbaa ogen de7iza biittanne Yordaanoose Shaafappe he pinththan de7iza, «Ayzaabeti de7iza Galila biitta» izi bonchchana.1
Dhuman de7iza derey
wolqqama poo7o be7ides;
hayqo kuwa garsan diza deretas
poo7oy poo7ides.2
Neni kawoteththaa darsadasa;
isttas ufayssaa bolla
ufays gujjadasa;
asay kath shiishshishenne
di7i ekkida miish gishettishe
ufayettiza mala
isttika ne sinththan ufayettana.
Kase neni Midiyaame biitta
xoonida mala
istta deexxiza qambara,
istta hashe bolla
wodhida durqqanne
istta waayisi haarida
guufe menththadasa.
Olanchchata caammay ubbay,
suuththan moorettida
may7o ubbayka
taman dunne gidi eexxana.
Hekko nuus nay yelettides!
Attuma naykka nuus imettides!
Halaqateththi
iza hashe bolla gidana;
iza sunththi,
«Malalisiza zoranchcha,
Wolqqama Xoossa,
Mernaa Aawa,
Saroteththa Halaqa» geetettana.
Iza kawoteththa aakoteththaassinne
iza saroteththaas zaway deenna;
hachchife doommidi
mernaa gakkanaas
ba kawoteththaa,
suure pirdaninne
xilloteththan essana;
lo7eththi oykkidi minththana;
Dawite kawoteththa araatan
izi uttana;
deraa ubbaa haarana;
Ubbaafe Wolqqama
GODAA qanaatey
hessa polana.3
Isra7eele Bolla Xoossa Hanqo
GODAY Yaaqoobe zareta bolla
pirda qaala kiittides;
izikka Isra7eele bolla polettana.
Efreemeninne Samaariyan de7iza
derey ubbay
hessa Xoossi ooththidayssa erana;
otoroninne
moodheteththan dendidi,
«Xuubeppe oosettida
gimbetti laalettida;
nuni gidikko
masettida shuchchan
zaari gimbana;
eththati qanxxettida;
nuni gidikko isttasohon
ziga laammana» gida.
Hessa gishshas GODAY
Eraasoone morkketa minththana;
istta morkketa istta bolla
denththeththidi ehana.
Arshey mokkiza baggafe
Aaraame biittaa asatinne
arshey wulliza baggafe
Filisxeeme biitta asati
bantta doona hangidi
Isra7eele mittana.
Hessi ubbay haniinkka
GODAA hanqoy irxxibeenna;
iza kusheykka
dendidasoppe simmibeenna.
Derezi gidikko bana shocida
GODAAKKO simmibeenna;
Ubbaafe Wolqqama
GODAAKKA koyibeenna.
Hessa gishshas
GODAY hu7enne goyna,
zamba hagganne maqqa
Isra7eeleppe issi gallas qeexana.
Cimatinne bonchchettidayti hu7e;
wordo tamaarsiza nabeti goyna.
Hayssa deraa kaaleththizayti
baleththeettes;
kaalliza dereykka ogeppe
kare kezidi toylattees.
Hessa gishshas GODAY
naateththa naytan ufayettenna;
yi7otassinne
am7etas qadhettenna;
ubbayka iita ooththizaytanne
Xoossa yashshateth bayndayta;
ubbaa asaa doonappe
harassiza qaalay kezees;
hessi ubbay haniinkka
GODAA hanqoy irxxibeenna;
iza kusheykka
dendidasoppe simmibeenna.
Deraa iitateththi kindichchonne
agunth xuuggiza tama mala;
dhippi gida woray xuugettishin
keziza cuwa tuussa mala
sitti giidi pude kezees.
Ubbaafe Wolqqama GODAA hanqon
biittay xuugettana;
dereykka taman geliza
miththa mala gidana;
ishay ishas qadhettenna.
Ushachcha baggara tuxxana;
gido attiin gafa teqqenna.
Hadirsa baggara maana;
gido attiin kallettenna.
Issoy issoy ba yelida
nayta maana.
Minaasey Efreeme maana;
Efreemeykka Minaase maana;
istti issife gididi
Yuhuda bolla dendana.
Hessi ubbay haniinkka
GODAA hanqoy irxxibeenna;
iza kusheykka dendidasoppe
simmibeenna.
Source notes (3)
- Cross-reference Mato 4:15
- Cross-reference Mato 4:16; Luqa 1:79
- Cross-reference Luqa 1:32-33
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.