Isayaasa Tinbite 64

1Abeet GODAWU, neni salota daakkada duge wodhdharkkii!

Zumati ne sinththan kokkoretto.

2Qayxare tamay

haath penttisiza mala,

ne morkketa matan ne sunththi

erettana mala wodhdha;

kawoteththatakka

ne sinththan kokkorssa.

3Kasekka neni nu qoppontta

yashissiza miish

ne ooththida wode

ne wodhdhiin zumati kokkorida.

4Beniisofe doommidi hidota ooththi

naagizaytas gakkiza

malaata ooththiday neeppe attiin

hara Xoos be7ida ayfeynne

siyida hayththi mulekka deenna.1

5Suure miish ufayssan

ooththizaytanne

ne oge qoppizayta

neni maaddaasa;

gido attiin nuni istta bolla

pacey baynda

nagara ooththida gishshas

hekko neni nu bolla

hanqettadasa;

histtiin nuni waani

attana dandayzonii?

6Nuni ubbayka

tuna asa mala gididos;

nu xilloteththa ooso ubbay

tunida carqqa mala.

Nuni ubbayka

boncco mala qokkidos;

nu nagaray nuna carko mala

pitti efides.

7Oonikka woosan

ne sunth xeygenna;

nena oykkana

paaccizaykka deenna;

neni ne ayfeso

nuuppe genththadasa;

nu nagaray nuna

dhayssana mala aggadasa.

8Gidikkoka abeet GODAWU,

neni nuus aawa; nuni urqqata;

neni nuna medhdhidayssa;

nuni ubbayka

ne kushen medhettidayta.

9Abeet GODAWU, keeha hanqettofa;

nu nagaraakka mernaas qoppofa;

nuus woosetta;

nu ubbay ne dere gidida gishshas

ne ayfeso nuukko haa zaara.

10Ne geeshsha katamati aykkoy baynda

bazzo gidida;

Xiyoonakka aykkoy baynda

bazzo biitta gidadus;

Yerusalaameykka yegetta attadus.

11Nu aawati kase nena

izan galatiza Xoossa Keeththay

taman xuugettides;

kase lo7osoti ubbatikka dhayda.

12Abeet GODAWU,

hayssi ubbay haniinkka

ne simmikii?

Neni co7u gaada nuna

zaway baynda qixaate qaxxayay?