Geeshsha Mexaafa
Isayaasa Tinbite 6
Nabeteththas Isayaasa Xeygeteth
Kawo Ooziyay hayqqida layth GODAY dhoqqa araata bolla uttidayssa beyadis; izi may7ida afala macaray Xoossa Keeth kumi uttides.1 Suraafeele geetettiza kiitanchchati izappe bollara deettes; issi issi suraafeeles usuppun qefeti deettes; nam7u qefetan ba ayfeso ayfeso kammeettes; nam7u qefetan ba toho toho kammeettes; nam7u qefetan piradhdheettes. Issoy issaara,
«Geeshshawu, geeshshawu,
geeshshawu
Ubbaafe Wolqqama
GODAA Xoossawu!
Sa7a ubbay
iza bonchchon kumides» gida.2
Istta qaala cenggurssafe dendidayssan Xoossa Keeththas yochchay qaaxxides; qasseka Xoossa Keeththaa cuway dhippi gi kumides.3
Histtiin tani, «Tani doonay tunida asa; qasse doonay tunida asata giddon de7ays; tani Kawoza, Ubbaafe Wolqqama GODAA Xoossa ta ayfen be7ida gishshas taas aayye ana! Ta dhayadis» gadis.
Histtiin suraafeeletappe issoy yarshizasozappe qaphen tama bonqqo ekkidi piradhdhishe taakko yides. Tamaa bonqqozan ta doonaa bochchidi, «Be7a; hayssi tamaa bonqqozi ne doonaa bochchides; ne mooroy neeppe kichchides; ne nagaraykka qucetti kichchides» gides.
Hessafe guye GODAY, «Oona kiittoo? Nuus oonee kiitettanay?» gishin siyadis. Tanikka zaarada, «Hekko, tana kiita» gadis.
Histtiin GODAY;
«Ba; baada ha asaas,
‹Intte sissi siyeeta;
gido attiin yuushshi qoppeketa;
ayfen xeelleeta shin akeekkeketa›
gaada isttas yoota.
Hayssa deraa wozinaa dammisa;
istta hayththaka tullisa;
istta ayfezakka qooqisa;
histtontta aggiko
istti bantta ayfen be7ana;
bantta hayththan siyana;
bantta wozinankka akeekana;
histtidi istti taakko
simmidi paxana» gides.4
Tanikka,
«Abeet Godawu!
Hayssi ayde gakkanaas
hananee?» gadis.
Izikka zaaridi taas,
«Katamati isttan de7iza asi
dhayiin istti laalettana
gakkanaas,
keeththatikka ubbay
kayzana gakkanaassinne
biittayka mulera aykkoy baynda
bula gidana gakkanaassa.
Tani GODAY asaa
haassana gakkanaassa;
biittaaka aykkoy baynda
bazzo kessana gakkanaassa.
Tammu asaappe issi asi
biittaa bolla attiko,
izikka dhayana;
qanxxi yeggiin attida
wolaa duruma mala gidana;
geeshsha zarey hessaththo
he duruma mala gidana» gides.
Source notes (4)
- Cross-reference 2Kawo 15:7; 2Taari 26:23
- Cross-reference Ajju 4:8
- Cross-reference Ajju 15:8
- Cross-reference Mato 13:14-15; Mar 4:12; Luqa 8:10; Yoha 12:40; Hawa 28:26-27
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.