Isayaasa Tinbite 50

Isra7eele Nagaranne Xoossa Aylle Azazeteth

1GODAY,

«Tani intte aayo

anjja yeddida waraqatay

awan dizee?

woykko ta inttena

ay tal7a ekkidaades bayzadinaa?

Be7ite intte intte

nagara gishshas bayzettideta;

intte mooro gishshas

intte aaya anjjetta badus.

2Tani yiza wode heen

asi ays dhaydee?

Ta xeygiza wode

zaaro immiza asi

heen waani dhaydee?

Inttena wozzana miish cigganaas

ta kushey qaammadee?

Woykko inttena ashshanaas

taas wolqqay guuththee?

Be7ite ta hanqon

abba melissays;

shaafatakka bazzo kessays;

isttan diza moleti

saamon hayqqidi zeeqqeettes.

3Tani salo dhumisana;

tani iza maaqa mayzana» gees.

4Ubbaa Haariza GODAY taas

inxarsa erateth immides;

hessa gishshas daaburanchchatas

ta ay gaana bessizaakko ta erays;

maalado maalado

tana beegoththees;

tamaarshe diza tamaare mala

siyanaas ta hayth doyees.

5Ubbaa Haariza GODAY

ta hayth doydes;

tani makkallanchcha diikke;

guyekka baqatabeekke.

6Ta zokko shocizaytas,

ta buuchcha shoddizaytas

aaththa immadis;

Ta ayfeso cuchchafe

genththabeekke.1

7Ubbaa Haarizaa GODAY

tana maaddiza gishshas

tani kawuykke;

hessa gishshas ta ayfeso

daldacha shuchcha mala

ooththadis;

tani yeellatonttayssa erays.

8Ta xilloteththa qonccisizaadey

ta matan dees;

histtiin tana mootana

dandayzay izi oonee?

Ane issife tiran gayttoos!

Ta baalgaaray oonee?

Ane haayo!

9Be7ite, Ubbaa Haariza GODAY

tana maaddees;

histtiin ta bolla pirdanay oonee?

Be7ite, istti ubbayka

may7o mala ceeggana;

bilay istta maana.2

10Intte giddofe GODAAS yayyizay,

iza ayllaa qaalas

azazettizay oonee?

Hessaadey dhuman

bizaa gidikkonne

poo7oy izas baynda aggiko

izi GODAA sunththan

ammanetto;

ba Xoossankka zemppo.

11Ha7i gidikko intte tama eeththidi,

laciza intte xomppe xomppe

oykkida ubbati

intte poo7on biite;

intte oyththida xomppe

poo7on simerettite;

Intte ta kusheppe

ekkanayssi hayssa;

intte iita meton kundana.