Isayaasa Tinbite 47

Baabiloone Bolla Yaana Pirda

1GODAY, «Hanne Baabiloone geela7oyee,

gudulla bolla wodhdha utta;

hanne Baabilooneta nayee,

ne araataappe wodhdha;

biittan utta;

hayssafe guye

neni mala lo7onne dalqidalqa

geetetta xeygettaka.1

2Woxa ekkada kath gaacca;

Ne goossaa qaara;

ne qamisaza qaara;

ne xifaa bessa;

gadigadashe shaafaa pinna.

3Ne kalloteththi qoncco;

yeellachchiza ne kalloy beetto;

tani halo makkana;

ta oonakka aggike» gees.

4Nuna Wozziza

Isra7eele Geeshshaas,

sunththay Godaa Ubbaafe

Wolqqama Xoossa.

5«Hanne Baabilooneta nayee,

dhumaso gelada co7u ga utta;

hayssafe guye ne kawoteththata

godatteyo geetetta xeygettaka.

6Tani ta deraa hanqettadis;

tani xinxxozakka tunisadis;

tani istta ne kushen

aaththa immadis.

Neni gidikko

isttas qadhettabeekka;

cimmidayta bollaka

keehi deexo qambara

woththadasa.

7Neni, ‹Tani mernaas

godatto gidana› gadasa.

Gido attiin haytantta

akeekabeekka;

istta wurseththi

ay gidanaakko qoppabeekka.

8«Hanne ishalo duus dizaaree!

Nerkka nenan

ammanetta uttidaaree!

Ne wozinan, ‹Tana;

taappe attiin haray baa.

Hannife guye tani am7o gidikke;

yelada dhoommidaaro gidikke›

gizaaree siya!

9Ha nam7u yo7oti,

am7eteththinne yeli dhonththi

qofay baynda issi gallas

ne bolla gakki wodhdhana;

ne ay keena bitikkoka,

ne ay keena muurennikokka

istti ne bolla

kumeththa wolqqara yaana.2

10Neni ne iitateththan ammanettada,

‹Tana ooninne be7enna› gadasa.

Qasse, ‹Tana;

taappe attiin haray deenna

ne gida wode

ne aadho erateththaynne

cinccateththi

nena baleththida› gadasa.

11Bashshi ne bolla yaana;

neni wostta muurenna

zaaranaakko erakka;

ne qanxxo immada

ne dandayontta qohoy

ne bolla gakkana.

Ne qoppontta metoy

ne bolla dingate yaana.

12Hekko be7a;

neni naateththafe doommada

ooththashe daaburda bitatanne

daro muurennota

gujja gujja ooththa;

oonee erizay nees hananaakko,

oonee erizay neni

ne morkketa shirosanaakko?

13Ne ekkida zore ubbay

nena daaburara ashshides;

aginappe agina gakkanaas

xoolintte xeelli kaayizayti,

xoolintte taybizayti

ane haa yetto;

nena gakkiza metoppe

ane istti nena ashshetto.

14Hekko istti happa mala;

tamay istta maana.

Tamaa lacoppe dendidayssan

bana ashshanaas

dandayettenna.

Asi ho7ana bonqqoy deenna;

uttidi ho7ana

tamaykka deenna.

15Naateththafe doommada

ne isttara daaburdayti,

ne isttara zal7idayti,

istti ooththana dandayzay

hayssa xalla;

issoy issoy ba mooro

gujji gujji baana;

gido attiin nena

ashshanay deenna» gees.