Isayaasa Tinbite 27

1He gallas GODAY lewataane geetettiza

xongettiza shooshshaanne

xaaxettiza shooshshaa

ba mino, gitanne wolqqama

giththa mashshan qaxxayana;

abban diza wogga do7aa

qanxxereththi yeggana.

2He gallas, «Woyne mith tokkiza

lo7osozas yexxite!

3Tani GODAY iza naagays;

tani ubbaa gallas haath ushshays;

omarsinne gallas iza naagays;

hessa gishshas ooninne

iza qohenna.

4Tani hanqettike;

tanara olettanaas agunththinne

kindichchoy kezidaakko

ta istta issi bolla xuuggana!

5Woykko taakko yiidi tana banttas

qotettizaso kessetto;

tanara giigetto;

ee tanara giigetto» geetettana.

6Yaana gallassatan

Yaaqoobey xapho yeddana;

Isra7eeley aacananne ciiyana;

histtiin istta ayfey

sa7a kumana.

7Izo shocidayta shocida mala

GODAY izo shocidee?

Izo wodhidayta izi wodhida mala

izo wodhidee?

8Olaninne di7on ne izo qaxxayadasa;

arshey mokkiza bagga carkoy

carkiza mala

wolqqama gote carkon

ne izo gooddadasa.

9Yaaqoobey yarsho

yarshizaso shuchchata

booqintta shuchcha mala

gaacci liiqisishin

Asheero geetettiza

eeqa xoossay mislenne

exaane cuwasiza sohota

istti dizasohotappe shoddi olishin

he gallas mooroy atto geetettana;

hessi izi ba nagara diggoyssas

kumeththa ayfe gidana.

10Gimbettida katamaya kayzadus;

bazzo biitta mala

olettidaso gidadus;

marati heen heemettidi

heen ichchana;

izi haggatakka poqqi maana.

11Izi xeeray melidi meqqana;

maccassatikka mixi eeththana;

akeekay baynda

dere gidida gishshas

iza medhdhiday

izas qadhettenna;

ooththidayssika iza maarenna.

12He gallas Efiraaxise shaafappe haaththi baynda Gibxe Shaafa gakkanaas GODAY ba kaththaa bukkana; intteno Isra7eele asatoo, intte issoy issoy shiiqana.

13He gallas gita zayey punettana; Asooren di7ettidaytinne Gibxen un7ettidayti guye Yerusalaame simmi yiidi geeshsha zumaa bolla GODAAS goynnana.