Geeshsha Mexaafa
Isayaasa Tinbite 11
Saroteththi Kumida Kawoteth
Isseye durumappe
aacay purccana;
iza xaphotappe
issi haggay ayfe immana.1
GODAA Ayanay,
aadho erateththinne
akeeka Ayanay, zore Ayanaynne
wolqqa Ayanay,
erateththa Ayanaynne
GODAAS yashissiza Ayanay
iza bolla shemppana.
GODAAS yashshan izi ufayettana;
ba ayfen be7ida malanne
ba hayththan
siyida mala pirdenna.
Gido attiin hiyeesatas
xillo pirdana;
sa7a bolla manqotas
suure pirdana;
ba inxarsaa xam7an
sa7a shocana;
ba doona peenon
iitata wodhana.2
Xilloteththi izas
xeessa dancco gidana;
ammaneteththay izas
dabala dancco gidana.3
Kana suytey dorsa laaqqara
issife daana;
maaheykka deysha laaqqara
issife ichchana;
miiza mari, gaammo marinne
modhdho mehey
issife heemettana;
guuththa nay istta heemmana.
Miizinne zardoy issife heemettana;
istta maratikka issife ichchana;
gaammoy boora mala
happa maana.
Dhammiza nay
iita shooshsha ollan kaa7ana;
dhanth duuththontta nay
ba kushe goppe shooshsha
ollan yeddana.
Geeshshi gidida
ta zumaa bolla qohettenna
woykko oonikka dhayenna;
haaththi abba kumiza mala
sa7a ubbay GODAA eron kumana.45
Di7etti Bidayta Simo
He wode Isseye zereththi kawoteththatas malaata gidi eqqana; kawoteththati izakko yaana; iza shemposoy bonchchettana.6 He wode GODAY nam7anththo ba kushe miccidi attida asaa Asooreppe, pudeha Gibxeppe, dugeha Gibxeppe, Tophphiyappe, Elaameppe, Sana7ooreppe, Hamaateppenne abba gaxan diza deretappe shiishshana.
Kawoteththatas malaata essana;
dhoqqu ooththidi denththana;
Isra7eeleppe goodetti bidayta
zaari ehana;
laalettida Yuhuda asaa
oyddu bagga biitta gaxappe
izi shiishshana.
Efreeme qanaateteththi eqqana;
Yuhuda morkketikka
qanxxettana;
Efreemey Yuhuda bolla
qanaatenna;
Yuhudaykka Efreeme ixxenna.
Istti arshey wulliza baggara
Filisxeemeta dugunththaa
wodhdhana;
nam7ayka issife gididi
arshey mokkiza dereza bonqqana;
istti Eedoome bollanne
Mo7aabe bolla
bantta kushe denththana;
Amoone asay isttas haarettana.
GODAY iita carkon
Gibxe abba melissana;
izi ba kushe Efiraaxise
shaafa bolla yeddana;
laappun kessi
shaakereththi yeggana;
hessa gishshas
asay tohoppe caamma
kessontta pinnana.7
Kase Isra7eeley Gibxeppe
kezishin hanidayssaththo
Asooren attida asay
kezana oge isttas giigsana.
Source notes (7)
- Cross-reference Ajju 5:5; 22:16
- Cross-reference 2Taso 2:8
- Cross-reference Efe 6:14
- Cross-reference Isa 65:25
- Cross-reference Im 2:14
- Cross-reference Oro 15:12
- Cross-reference Ajju 16:12
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.