Hose7e Tinbite 10

1Isra7eele asay daayida

woyne miththa mala.

Istti daro ayfe ayfida;

ayfezi darida keena

daro yarshosoho medhdhida.

Istta biittaya lo7o ayfe immada

istta duresida mala

istti goynniza tuussata aleqessida.

2Istta wozinan geney kumides;

istti ba ooththida geneza

waaga ekkana.

GODAY istti yarsho

yarshizasohota

ubbaa laallana.

Istti goynniza eeqa xoossa

tuussatakka shoddana.

3Isttika, «Nuus kawoy deenna;

nuni GODAA bonchchontta

gishshas kawoy dizaakkoka

izi nuus ay ooththanee?» gaana.

4Istti wordora caaqqidi

qaala geleettes;

hada hidota ooththeettes;

hessa gishshas kaththa giddon

marzera diza haruma maatay

mokkiza mala

istta giddon gene pirday darana.

5Samaariya kataman diza derey

Beeti-Awenen diza

mara mislen oosettida

eeqa xoossas yayyees.

Izappe bonchchoy qaaretti

kichchida gishshas

asay yeekkees.

He eeqa misleza qeesetikka

waasseettes.

6He eeqa mislezi gita gidida

Asoore kawos kiyateth imettana.

Efreemey kawuyana;

Isra7eeleykka bantta eeqa

xoossa gishshas yeellatana.

7Samaariya kawoy

haaththa goppontto mala

coo dhayana.

8Isra7eeles nagara gidida

Beet-Awenen goynnizasoho

zumbullazi dhayana;

okkaynne ohay mokkana;

He wode derey zumata,

«Nuna qottite!»

zumbullatakka

«Nuna kammite!» gaana.1

Goday Isra7eele Asaa Qaxxayana

9GODAY, «Isra7eele asawu!

Gibi7an nagara ooththoosoppe

hach gakkanaas

Geba7oonen nagara ooththizayta

olay wursibeennee?2

10Tani koyza wode istta qaxxayana;

Istti ooththida

dakko nagara gishshas

qixaatey istta bolla gakkana;

kawoteththati

istta bolla dendana.

11Isra7eeley kath bukkanaas

dosiza mehe mala;

gido attiin lo7iza izi morge bolla

qambara woththana;

Efreeme waaxana;

Yuhuday goyana;

Yaaqoobe nayti

waaxettidi biitta pixana.

12GODAY yiidi xilloteth

intte bolla ira mala

bukisana gakkanaas

hanna intte iza koyza wode

gidida gishshas oththaa goyite;

inttes xilloteth zerite;

mino siiqo ayfe maxite.3

13«Intte gidikko intte wolqqaninne

intte ola qarata daroteththan

ammanettidi iitateththi zerideta;

nagara shiishshideta;

wordoteththa ayfe mideta.

14Shilimaaney Beeti-Arbeele

geetettiza katama olan kase

laallidayssaththonne

Aayeta naytara gaththi

biitta bolla

dincereththi wursida mala

shiroy deraa bolla yaana.

Intte dere asaa bolla wolqqama

olay yaana;

Intte miixay laalettana.

15Beetele! Ne iitateththi

gita gidida gishshas

ne bollaka hessaththo hanana;

he gallassaya gakkiza wode

Isra7eele kawoy

mulera dhayana» gees.