Hiziqeela Tinbite 15

Woyne Tura Leemiso

1GODAA qaalay taakko yiidi, 2«Haysso asa nawu! Woyne turay woran diza hara miththata ubbaa haggafe aazan aadhdhizee? 3Go7iza miish ooththanaas iza anoppe eketti erizee? Issi miish kaqqanaas kocay izappe eketti erizee? 4Izi eexxana mala taman yeggidaappe guyen nam7u bagga xeera tamay miidi giddoza labikko hessi go7anaas dandayzee? 5Lo7o gidi uttidi ay go7akka immontta aggiko tamay xuuggidaappenne labidaappe guye keehi go7ay bayndaaz gidana.

6«Hessa gishshas Ubbaa Haariza GODAY, ‹Tani wora miththa giddon diza woyne ano taman eexxana mala ta aaththa immidayssaththo Yerusalaamen dizaytakka aaththa immana. 7Tani ta ayfeso iitateththan istta bolla zaarana; istti tamappe kessi ekki attidaa gidikkoka buro istta tamay maana; tani ta sinth iitateththan isttako zaariza wode tani GODAA gididayssa intte erana. 8Istti ammanettontta aggida gishshas tani biittayo asi baynda bula kessadis› gees» gides.