Eranchchata Maxaafa 11

Aadho Eranchchay Ooththana Bessiza Ooso

1Ne kath haaththan yegga;

daro gallassatappe guye

neni zaara demmana.

2Nees diza aqo laappun woykko

osppun sohon

shaakereththa woththa;

ays giikko biitta bolla

ay iitay yaanaakko neni erakka.

3Shaaray karexxiko

biittaa bolla iray bukkees.

Miththi pudeha woykko

dugeha kundiko

ba kundidason ichchi attees.

4Carko hanota naagizay zerenna;

qasse shaara mallizay

ba kath shiishshenna.

5Carkoy awara bizaakko

iza oge erakka;

qasse shemppoy woykko ayanay

aayi ulon diza medheta giddon

waani gelizaakko ne erakka.

Hessaththoka ubbaa

medhdhida Xoossa ooso

ne shaakka erana dandayakka.

6Maaladora ne zereth zera;

omarsika ne kushey

ooso birshofo;

gaasoykka hayssi woykko hessi,

woykko nam7ay lo7anaakko,

woykko awayssi ayfanaakko

ne erakka.

Yelagateththan Nena Medhdhidayssa Qoppa

7Poo7oy lo7o;

awa ayfe be7oy

ayfe ufayssees.

8Asi keehi adussa layth

ha sa7an de7ikko

he ubbaankka ufayetto.

Gido attiin dhuma gallassati

dariza gishshas qoppo;

buro yaana miishshi

ubbayka hada.

9Haysso yelagazoo!

Ne naateteththa

layththan ufayetta;

ne naateteththa layththan

ne wozinan ufayetta;

ne ayfey xeellida ubbaanne

ne wozinay amottida ubbaa pola;

gido attiin ne ooththida ooso

ubbaa gishshas Xoossi nena

pirdas shiishshanayssa era.

10Hessa gishshas ne wozinappe

ceece haassa;

iita miishshika neeppe digga;

gaasoykka naateteththinne yelagateththi

elle aadhdhana.