Amoxe Tinbite 3

Isra7eele Asaa Bolla Gakkana Hanqo

1Isra7eele asawu! Gibxeppe kezida Isra7eele asaas inttes GODAY yootida qaala hayssa siyite.

2Xoossay,

«Kumeththa alamen diza dere

ubbaafe ta inttena xalla dooradis;

intte ooththiza

nagara ubbaa gishshas

ta inttena qaxxayays» gees.

3Nam7u asati oge issife baana giidi

qachchontta aggiko

issife baanaas dandayzoo?

4Gaammoy wora giddon

aykko miza miish

shankkati demmontta dishe

coo mela xaaggi erizee?

Wodalla gaammoy

aykko miza miish

demmontta dishe ba dizason

coo mela ba qaala sissi erizee?

5Yardey woykko gitey bayndason

coo mela gaden

kafoy oyketti erizee?

Woykko diizay issi miishshi bana

bochchontta dishin

coo mela piri erizee?

6Katama giddon olas

zayey punettishin

babon kokkorontta asi di erizee?

GODAA sheney baynda dishin

katama bolla iita miishshi

gakki erizee?

7GODAY ba xuura ba oosanchcha

nabetas koyrotti yootontta dishe

aykkoka ooththenna.

8Gaammoy xaaggiin siyidi

dagammonttay oonee?

GODAY ba xuura izas yootiin

tinbite haasayonttay oonee?

Samaariya Kundeth

9Ashdoodeninne Gibxen diza

miixatan diza ubbaas,

«Samaariya zumata bolla shiiqite;

heen isttan oosettiza

gene oosonne

bul7aketizayssa xeellite»

gi awajjite.

10GODAY,

«Hayti dereti lo7o

ooso erettenna.

Makkallaninne

genen ekkida miishshan

ba miixa kunththeettes.

11Hessa gishshas intte dere

morkkey worajjana;

intte miixata laallidi

intte keeththaaka bonqqana» gees.

12GODAY,

«Heenththanchchay

gaammo doonappe

dors woththi ekkiza wode

dorsas nam7u gedata woykko

duuxa hayththata

woththi ekkiza mala

Samaariya biittan ishalon uttida

Isra7eele asaappe guuththati

xalla attana» gees.

13Salo GODAY,

«Hekko ane hayssa siyite!

Yaaqoobe zereththa bolla

markkattite.

14Istti ooththida nagara gishshas

tani Isra7eele

asaa qaxxayiza wode

Beetelen diza

yarsho yarshizasohota

tani laallana;

yarshizasohota bolla diza

kaceti meqeretti kundana.1

15Istti izan bonenne balgo diza

keeththata ubbaa

ta laalla dhayssana;

danggarsa zaalen

lo7eththi alleqissida

keeththati wurikka laalettana;

gita keeththati

wurikka dhayana» gees.