Geeshsha Mexaafa
2Taarike Maxaafa 27
Yuhuda Kawo Iyo7aatame
(2Kawo 15:32-38)
Iyo7aatamey kawotiza wode izas layththay 25; izi Yerusalaamen 16 layth kawotides; iza aaya Saadooqe biyo Iyeruso geetettawus. Kase iza aawa Ooziyay ooththidayssa mala izikka GODAA sinththan suure miish ooththides; gido attiin iza aaway Xoossaa keeth gelida mala izi gelibeenna; asay gidikko nagara ooso aggibeenna.
Iyo7aatamey Xoossaa keeth gelizaso qommo bagga penge zaareththidi ooththides; qasse Ofeele baggara diza gimbeza daro lo7eththo ooso ooththides. Yuhuda zumbullata bolla katamata ooththides; worata giddon miixatanne adussa gimbeta gimbides.
Iyo7aatamey Amoone kawora olettidi xoonides; Amooneti he layththi 3,400 kilo giraame deexxiza bira, 10,000 konttaale gidiza gisttenne 10,000 konttaale gidiza bangga izas giirida. Amooneti nam7anththo layththinne heedzdzanththo layththi hessaththoka ehidi izas giirida. Iyo7aatamey ba GODAA sinththan ammaneteththan simerettida gishshas keehippe minni minni bides.
Iyo7aatame kawoteththa layththan hanida hanoti, izi olettida olati ubbaynne izi ooththida ooso ubbay Isra7eele kawotanne Yuhuda kawota Taarike Maxaafan xaafetti uttides. Izi kawotishin izas layththay 25; izi Yerusalaamen 16 layth kawotides. Iyo7aatamey ba aawataththo hayqqides; Dawite kataman moogettides; izasohon iza naa Akaazey kawotides.
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.