ዛካራሳ ቲንቢቴ 13

ናጋራፔ ጌማዛሙሬ

1ኡባፌ ዎልቃማ ጎዳይ፥ «ሄ ጋላስ ዳዊቴ ኬ ኣሳኔ ዬሩሳላሜን ዲዛ ኣሳ ናጋራፔኔ ቱናቴፌ ጌሻናስ ፑልቶይ ፑልታና።

2«ታኒ ሄ ዎዴ ቢታፌ ኤቃ ጾሳታ ሱን ይሳና፤ ሄሳፌ ናምኣን ኢስቲ ቆፌቴቴና፤ ኢስታ ናቤታኔ ቱና ኣያናታ ቢታይ ቦላፌ ታ ዲጋና። 3ኦኒካ ታኒ ናቤ ጊኮ ኢዛዴ ዬሊዳ ኣዋይኔ ኣዬያ ኢዛ ኔ ጎዳ ሱንን ዎርዶ ሃሳይዳ ጊሻስ ኔስ ሃይቆይ ቤሴስ ጌቶ፤ ኢዚ ቲንቢቴ ሃሳይሺን ኢዛ ዬሊዳይቲ ኢዛ ጫዴቶ። 4ሄ ዎዴ ዎርዶ ሃሳይዳዴይ ኦኒካ ባ ሃሳይዳ ዎርዶ ቲንቢቴን ዬላታና፤ ባሌናስ ኢስኬራ ዲዛ ናቤታ ማይኦ ማይኤና። 5ኢዚካ፥ ‹ታ ጎሻ ኣሳ ኣቲን ናቤ ጊዲኬ፤ ታ ናቴቴፌ ዶማዳ ሃኖ ጋካናስ ጎሻንቻ› ጋና። 6ኢሲ ኣሲ፥ ‹ሄሲ ኔ ቦላ ኣይ ማዱን?› ጊ ኦይቺኮ ኢዚ፥ ‹ታ ሃይሳ ታ ላጌታሶን ዳሼ ማዱንጻዲስ› ጊዴስ።

ሄንንቻይ ሾጬቲን ኢዛ ዶርሳታ ላሌቴ

7«ኡባፌ ዎልቃማ ጎዳይ፥

‹ማሻ! ታ ሄንንቻ

ታ ዳሮ ዶሲዛይሳ ቦላ ቤጋ!

ሄሚዛይሳ ሾጫ፤

ዶርሳቲካ ላሌታና፤

ታኒካ ታ ቄሴ ጉታ ቦላ

ዴንና› » ጌስ።1

8ጎዳይ፥ «ቢታ ኡባን ዲዛ

ሄ ኩሼ ኣሳፔ

ናምኡ ኩሼይ ያና፤

ኢሲ ኩሼ ኣሲ ኣታና።

9ሄ ኣቲዳ ኢሲ ኩሼ ኣሳ

ታ ጌዴ ታማን ዬጋና፤

ቢራ ታማን ጌሺዛ ማላ

ታ ጌሻና፤

ዎርቃ ማላካ ፓጫና፤

ኢስቲ ታ ሱን ጼይጋና፤

ታኒካ ኢስታስ ኮያና፤

ታ ኢስታስ፥ ‹ታ ዴሬታ› ጋና፤

ኢስቲካ፥ ‹ኑ ጎዳ›

ጋና» ጊዴስ።