ዛካራሳ ቲንቢቴ 10

ጎዳይ ዩሁዳ ናጋናስ ዎዳ ሂዶታ

1ጎዳይ ኢንቴስ ኣሱራ ኢራ

ኢማና ማላ ዎሲቴ።

ኢራ ሻራ ኪቲዛይ ጎዳ፤

ኢዚ ኡባ ኣሳስ

ጊዲዛ ኢራ ኢሜስ፤

ኢሳስ ኢሳስ ቶካናስ

ዶዛ ኢሜስ።

2ኤቃ ጾሳቲ

ባሌ ዮኦ ዮቴቴስ፤

ማሮቲ ዎርዶ ኣጁታ ቤዬቴስ፤

ካዪዛይቲ ዎርዶ

ኣጉሞ ኣጉሜቴቴስ፤

ኣሳካ ጮ ሃዳ ዮኦን

ሚንቴስ፤

ሄሳ ጊሻስ ዴሬይ

ሄሚዛዴይ ባይንዳ ዶርሳ ማላ

ጮ ሜላ ቶይላቲሼ ቆሄቲዴስ።

3ጎዳይ፥ «ታ ሃንቆይ

ሄንንቻታ ቦላ

ታማ ማላ ኤጺ ኬዚዴስ።

ዴራ ካሌዛይታ

ታ ቃጻያና።

ታኒ ኡባፌ ዎልቃማ ጎዳይ

ባ ዉዴ ጊዲዳ ዩሁዳ ኣሳ

ኦላስ ጊጊዳ ፓራ ማላ ኦና።

4ዩሁዳፔ ጉላን ዎዛ

ሹቺ፥

ዱንካኔ ቶሊዛ ሽኬይ፥

ኦላ ቶራይኔ

ዴሬ ኡባ ሃሪዛይ ኬዛና።

5ኢስቲ ኡባይካ ኢሲ ቦላ

ኦጌን ዲዛ ኡርቃ ዬዛ

ሚኖ ኦላንቻታ ማላ ጊዳና፤

ጎዳይ ኢስታራ ዲዛ ጊሻስ

ፓራን ኦሌቲዛይታ ኢስቲ ጾናና።

6«ታኒ ዩሁዳ ኬ ሚንና፤

ታ ኢስታስ ቃቲዛ ጊሻስ

ኢስቲ ካሴ ዲዛሶታ ኢስታ ዛራና፤

ታኒ ጎዳ ኢስታ ጾሳ ጊዲዳ ጊሻስ

ታ ኢስታ ዎሳ ሲያና፤

ኢስቲካ ሃይሳፌ ካሴ

ታ ዬጋ ኤሮንታ

ኣሳ ማላ ጊዳና።

7ኤፍሬሜ ኣሳይ

ዎልቃማ ኣሳ ማላ ጊዳና፤

ኢስታ ዎዚናይ

ዎይኔ ኡሹ ኡዪዳ

ኣሳ ማላ ኡፋዬታና፤

ኢስታ ናይቲ ኢስታ

ቤያናኔ ኡፋዬታና፤

ኢስቲካ ጎዳን ኡፋዬታና።

8ታኒ ኢስታ ዋይቄን ጼይጋዳ

ኢሲ ቦላ ሺሻና፤

ቱማፔ ታ ኢስታ ዎዛና፤

ካሴ ማላ ታ ኢስታ ዳርሳና።

9ታኒ ኢስታ ዴሬታ ጊዶን ላሊኮካ

ኢስቲ ሄን ሃሆ ዴሬን ዲሼ

ታና ቆፓና፤

ኢስታኔ ኢስታ ናይቲ

ሼምፖራ ፓጻ ኣቲዲ

ጉዬ ሲማና።

10ታኒ ኢስታ ጊብጼፔ ኬሳና፤

ኣሶሬፔካ ሺሻና፤

ኢስታስ ኡቲዛሶይ

ኡንኣናሼ ጋካናስ

ታኒ ኢስታ ጋላኣዴኒኔ

ሊባኖሴን ሺሻና።

11ኢስቲ ኣባ ጊዶራ

ዋዬቲ ኣና፤

ኣባ ዳምባላይ ጮኡ ጋና፤

ጪማ ኣባይካ ዉሪ ሚጫና፤

ኦቶራንቻ ኣሶሬ ዴሬ

ኣሳይ ካዉያና፤

ጊብጼ ካዎቴ

ጻምኣይ ሜቃና።

12ታኒ ኢስታ ጎዳን ሚንና፤

ኢስቲካ ኢዛ ሱንን

ሲሜሬታና» ጌስ።