ጌሻ ማጻፋ
ሲቆ ሳባ 4
ፓንዚ
«ታ ጎዴ! ኔ ኣይ ማላ ሎኦ!
ኔኒ ኣይ ማላ ጊጋ!
ኔ ኣይፌቲ ኔ ኣይፌሶ ካሚዛ
ቁራጬ ጊዶራ ጼሊዛ ዎዴ
ሃራጴ ማላ ሎኤቴስ፤
ኔ ቢናናይ ጋላኣዴ
ዙማራ ዱጌ
ዎዛ ዴይሻ
ዉዴ ሚሳቴስ።
ኢስታ ጊዶን ማይኔይ ባይንዳ
ሜንቴ ሜንቴ ዬሊዛ
ኢስኬይ ዲሬቲን
ሜጬቲ ኬዚዛ
ቦ ዶርሳ ዉዴታ ማላ
ኔ ኣቻቲ ታና ኡፋይሴቴስ።
ኔ ሜቴርሻቲ
ዞኦ ቃጪና ማላ ሎኤቴስ፤
ኔ ሃሳይዛ ዎዴ
ኬሂ ኡፋይሴቴስ፤
ኔ ሻጋላቲ ኣይፌሶ ካሚዛ
ቁራጬ ጊዶራ ጼሊዛ ዎዴ
ኦሮማኔ ናምኡ ኬሲ
ጳልቂዳ ሚሳቴቴስ።
ኔ ቆይ ሺያን
ቆዴቲዛ ጎንዳሌቲ፥
ኦላ ማሳራቲ ኢዛ ቦላ
ካቄቲ ቤቲዛኔ
ኦላ ሚጻ ጊዳናስ
ኦሴቲዳ ዳዊቴ ጊምቤ ሚሳቴስ፤
ኔ ንቲ ሜንቴ ዬሌቲዲ፥
ሱፌ ጪሻታ ጊዶን
ሚዛ ጌኔሳ
ላቃታ ሚሳቴቴስ።
ቃማይ ዎንታና ጋካናስ፥
ማይ ኣና ጋካናስ
ካርቤይ ዲዛ ዙማ ቦላኔ
ኤጻኔይ ኢዛ ዙምቡላ ቦላ
ባዳ ሼምፓና።
ታ ጎዴ!
ኔ ኣሳቴይ ኩሜ ሎኦ፤
ኔ ቦላ ኣይኮ ዎሶይካ ባዋ።
ታ ሚሺራዬ! ሊባኖሴፔ
ሃ ዱጌ ዎ፤
ጋሞይኔ ማሄይ ዲዛሶ
ኣማና ዙማፔ፥
ሳኒሬ ዙማፔኔ
ሄርሞኔ ዙማፔ ዎዳ
ሃ ያ።
ታስ ሲቆ ሚቾ ጊዲዳ
ታ ሚሺራዬ!
ኔ ጼሊዛ ጼሎይኔ
ኔ ቆን ዲዛ ኣሌቆይ
ታ ዎዚና ኤኪዴስ።
ታስ ሲቆ ሚቾ ጊዲዳ
ታ ሚሺራዬ!
ኔ ሲቆይ ታና ኣይ ማላ ኡፋይሲዜ!
ኔ ሲቆይ ዎይኔ ኡሻፌ
ኣ ኡፋይሴስ፤
ኔ ሺቶይ ኡባፌካ
ኣዲ ሳዌስ።
ታ ሚሺራዬ!
ኔ ሜቴርሻራ
ኤሳ ኢሊሎይ ጾኬስ።
ኔ ዶናፔ ኤሲኔ
ማ ፑልቴስ፤
ኔ ማይኦ ሳዎይ
ሊባኖሴ ሺቶ ማላ ሳዌስ።
ታስ ሲቆ ሚቾ ጊዲዳ
ታ ሚሺራዬ!
ኔ ታስ ዲርሳ ጊዶን ናጌቲዛ
ኣታኪልቴ ማላ፥
ኢዛስ ዩሾይ ሹሬቲዳ
ፑልቶ ሃ ማላኔ
ኣሲ ጋኮንታ ፒሳ ሃ ማላ።
ኔ ኣ ቢዛሶን
ማልኢዛ ሚ ኣይፌቲ ኩሚዳ፤
ሄይቲካ ኦሮማኔ
ኣታኪልቴሶሆታ ማላ።
ናርዶሴይ፥ ላዴይ፥
ሳዎ ማታይኔ ቃራፋይ፥
ቃሴካ ኤጻኔ ማላ ሳዊዛ
ዱማ ዱማ
ኣታኪልቴቲ ዴቴስ፤
ሃራይ ቃሴ ካርቤይ፥
ጎዳሬ ኡ ጪሻይኔ
ዱማ ዱማ
ሳዎ ኣታኪልቴቲ ሞኬቴስ።
ኔኒ ኣታኪልቴ ኡሺዛ
ፑልቶ ሃ ማላ፤
ዴኦ ሃ ኬዚዛ ኦላ ማላ፤
ሊባኖሴ ዙማ ጋርሳፌ
ጎጊዛ ሻፋ
ሃ ማላ» ጊዴስ።
ጌላኦያ
«ፑዴሃ ባጋ ጫርኮዞ! ዴንዳ!
ዱጌሃ ባጋ ጫርኮዞ! ሃ ያ!
ታ ኣታኪልቴ ቦላ ጫርካ!
ሄራዚ ኡባይ ሳዎ ቱኑ ጎ።
ታ ሲቆዚ
ባ ኣታኪልቴ ጊዶ ዮ፤
ዶሬቲዳ ሚ
ኣይፌታካ ሞ» ጋዱስ።
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.