ሲቆ ሳባ 1

1ማዛሙሬ ኡባፌ ኣዛ ሶሎሞኔ ማዛሙሬ።1

ጌላኦያ

2«ኔ ሲቆይ ዎይኔ ኡሻፌ

ኣ ኡፋይሴስ፤

ኔ ሜቴርሻን ዛራ ዛራዳካ

ታና ዬራ።

3ኔ ቲዬቲዛ ሺቶይ

ኣይ ማላ ሳዊዜ!

ኔ ሱንይ ጼይጌቲዛ ዎዴካ

ኣይ ማላ ኡፋይሲዜ!

ጌላኦቲ ኔና

ሄሳ ጊሻስ ሲቄቴስ።

4ታና ኔናራ ኤካዳ ባ፤

ሃ ያ፥ ኣኔ ናምኣይ ኢሲፌ ዎጾስ!

ታ ካዎ፥ ታና ኔ ቁሩጾ

ጊዶ ጌል» ጋዱስ።

ላጌቲ

«ኢዛን ኑኒ ኣይ ኬና

ኡፋዬቲዶኒ!

ኑኒ ኢዛ ሲቆ

ዎይኔ ኡሻፌካ

ኣዲ ናሾስ።

ቱሙካ ማጫሳይ ኡባይ ኔና

ሲቃናስ ቤሴስ» ጊዳ።

ጌላኦያ

5«ኢንቴኖ ዬሩሳላሜ

ማጫሳቶ፥ ሲዪቴ!

ታኒ ካሬ ጊዲኮካ ማላ ሎኦ።

ታ ካሬቴይ

ቄዳሬ ዱንካኔ ማላ፤

ጊዶ ኣቲን ታ ሜይ

ካዎ ሶሎሞኔ ኬ

ማጋላሻታ ማላ።

6ታ ሜ ካሬዳይ ኣዋ ሴላ፤

ታኒ ካሬ ጊዲዳ ጊሻስ

ታና ካፒቴ።

ታ ኣዪ ና ኢሻቲ

ታናራ ኦዬቲዲ

ታና ዎይኔ ኣታኪልቴ

ናጋናስ ዎዳ፤

ሄሳ ጊሻስ ታኒ ታይሳ

ናጋቤኬ።

7ታ ሲቆዞ! ኣኔ ታስ ዮታ፤

ኔ ዶርሳ ዉዴ ሄሚዛይ ኣዋኔ?

ጋላስ ኣዋፔ ኔ ኢስታ

ጉሪሲዛይ ኣዋኔ?

ኔና ዴማናስ

ኔ ላጌታ ዉዴ ካላሼ

ኣይስ ጮ ቶይላቲዛ

ማጫሳ ማላ ጊዶ?» ጋዱስ።

ፓንዚ

8«ሃ ማጫ ኡባፌ ኣ

ሎኢዛ ማላንቻዬ!

ታ ዲዛሶ ኤሮንታ ኣጊኮ

ዶርሳቲ ቢዳ ጌዶ ካላዳ ያ፤

ኔ ዴይሻ ላቃታካ

ሄንንቻታ ዱንካኔ

ማታን ሄማ።»

9«ታ ጎዴ! ጊብጼ ካዎስ

ፓራ-ጋሬ ጎቺዛ

ፓራታ ጊዶን ዲዛ

ማጫ ፓራይ ማላ ሎኣሳ።

10ኔ ሻጋላሶይ ሎዡ ጊዴስ፤

ኔ ቆይ ኢንቁ ጌቴቲዛ

ሴሎን ኣሌቄቲዴስ።

11ኑኒ ኔስ ቢራን ኣሌቄቲዳ

ዎርቃ ጌጼ ኦሲሳና» ጊዴስ።

ጌላኦያ

12«ካዎይ ማዳን ኡቲ ዲሺን

ታ ሺቶ ሳዎይ ኬ ጊዶ

ኡባን ቱኑ ጊዴስ።

13ታ ሲቆዚ ታ ንታ

ጊዶን ዲዛ

ሳዊዛ ካርቤ ጹንቴ ማላ።

14ታ ሲቆዚ ኤን-ጋዴ ጌቴቲዛ

ዎይኔ ቶኪዛ ጋዴን ሞኪዳ

ባዞ ጪሻ ማላ» ጋዱስ።

ፓንዚ

15«ታ ጎዴ! ኔኒ ኣይ ማላ ሎኣይ!

ኔኒ ኣይ ማላ ሎኣይ!

ኔ ኣይፌቲ ሃራጴ ማላ

ሎኤቴስ» ጊዴስ።

ጌላኦያ

16«ታ ሲቆዞ፥

ኔኒካ ኣይ ማላ ሎኣይ!

ኔ ኬሃ ሎኣሳ፤

ኑ ሂይ ጪሊላ ማታ ማላ

ኡፋይሴስ» ጋዱስ።

ፓንዚ

17«ኑ ኬ ቱሲ

ሊባኖሴ ዚጋ፤

ካራይካ

ጺዳን ኦሴቲዴስ» ጊዴስ።