ኦሮሜ ኣሳስ

ጳዉሎሲ

ኦሮሜ ኣሳስ

ጻፊዳ ኪታ

ጊዶ ቆፋ

ሃዋሬ ጳዉሎሳ ኪታይ ኦሮሜ ኣሳስ ጻፌቲዳይ ጳዉሎሲ ኦሮሜን ዲዛ ዎሳ ኬዮ ጋኪ ቤያናስ ቆፒዳ ጊሻስ ኢስቲ ኢዛ ጊጌቲ ናጋና ማላ ኤሪሳናሳ። ጳዉሎሳስ ዲዛ ቆፋይ ኦሮሜን ዲዛ ኣማኒዛ ኣሳራ ጉ ዎዴ ኦዳፔ ጉዬ ኢስቲ ኢዛ ማዲኮ ኢዚ ኢስፔኔ ቢታ ባናሳ፤ ኢዚ ባስ ጌሊዳ ማላ ኢስታስካ ኣማኖይ ጌሊን ኣማኒዛይቲ ባ ዱሳን ኣማኖ ቤሳና ማላ ኣማኖ ቲሚርቴ ሃኖ ኢስታስ ኡባ ቢርሺ ጻፊዴስ፤ ጳዉሎሳ ኪታይ ኩሜ ጊዲ ቤቲዳይ ሃይሳ ሃ ኪታዛና።

ጳዉሎሲ ኦሮሜን ዲዛ ኣማኒዛ ኣሳስ ባ ሳሮካ ዬዲዳፔኔ ኢስታስ ኢዚ ዎሳና ቃላ ጌሊዳፔ ጉዬ ባ ኪታስ ዋና ኣይፌ ዮኦ (1፡17) «ጾሳፌ ቤቲዛ ጺሎቴ ኣማኖኔ ኣማኖስ ጊዲዳ ማላ ሚሺራቾ ቃላን ቆንጪዴስ» ጊዛ ቃላ ጊዲዳይሳ ቤሴስ።

ሄሳፌ ጉዬ ጳዉሎሲ ሃይሳ ሃ ቆፋዛ ጉጂ ኣሲ ጻፌስ፤ ኣይሁዳታካ ጊዲን ዎይኮ ሃንኮ ዴሬ ኣሳ ጊዲን ኣሲ ዉሪካ ናጋራስ ሃሬቲዳ ጊሻስ ጾሳራ ማቃይናናስ ቤሴስ፤ ኣሳይ ጾሳራ ማቃይናና ዳንዳይዛይ ዬሱስ ኪርስቶሳን ኣማኖና። ሄሲ ኣሳይ ጾሳራ ዶሚዳ ኦራ ኢሲፌቴ ኣይፌይ ኦራ ዴኦ ጊዲዳይሳ ጳዉሎሲ ሎኤ ኤሪሴስ፤ ኣማኒዛዴይ ጾሳራ ሳሮን ዴኤስ፤ ጾሳ ኣያና ባጋራ ሄሳዴይ ናጋራፔኔ ሃይቆ ዎልቃፌ ዎዜቴስ፤ ሼምፖ 5-8 ጋካናስ ጳዉሎሲ ጾሳ ዎጋ ጊሻሲኔ ኣማኒዛይታ ዴኦን ኦዛ ጾሳ ጺሎ ኣያናስ ቆፋይ ኣዛኮ ቆንጪሴስ። ቃሴካ ጉጂዲ ጳዉሎሲ፥ «ኣሳ ዜሬ ጊሻስ ጾሳስ ዲዛ ቆፋ ጊዶን ኣይሁዳይኔ ኣይዛቤይ ኢሲፌ ኦይኬታናስ ዳንዳይዜ?» ጊዛ ኦይሾስ ዛሮ ኢማናስ ባጼቴስ።

ቃሴካ ጳዉሎሲ ቆንጪሲዳ ማላ ኣይሁዳቲ ዬሱሳ ኣማኖንታ ኣቲዳይ ጾሳ ቆፋ ማላ፤ ሄሲካ ሃኒዳይ ዬሱስ ኪርስቶሳ ባጋራ ጾሲ ቆንጪሲዳ ኢዛ ኣቶቴ ኪያን ኩሜ ኣሳ ዜሬ ዉሪካ ጋኪ ኤካና ጋናሳ፤ ጊዶ ኣቲን ኣይሁዳ ኣሳይ ዬሱሳን ኣማናና ዎዴይ ያናይሳ ጳዉሎሲ ኣማኔስ። ዉርሴን ጳዉሎሲ ኣማኖን ዋኒ ዴኣናኮኔ ሃራፔካ ኣማኒዛይቲ ባ ጋርሳን ባስ ዲዛ ጋይቶቴን ሲቆ ኦጌ ካላናስ ቤሲዛይሳ ኢስታ ኤሪሴስ። ጉጂዲካ ኢስታስ ጾሳ ኦሶ ጊሻስ ኣማኒዛይቲ ባ ዴሬ ጊሻስ፥ ባ ጋርሳን ኢሶይ ኢሳ ናጋናስ ቤሲዛ ኣላፌቴ ጊሻሲኔ ቆፋፔ ዴንዲዛ ኦይሻታ ኡባ ሁኤን ሁኤን ኤሪሴስ።

ሃ ማጻፋይ ኦይኪዳ ኩሜ ቆፋ

ሃ ማጻፋዚ ኦይኪዳ ኣይፌ ቆፋታ

ኣሳ ናስ ኣቶቴ ኮሼስ

ጾሲ ኣሳ ና ኣሺዛ ኦጌ

ኪርስቶሳ ባጋራ ቤቲዛ ኦራ ዴኦ

ኢስራኤሌ ኣሳይ ጾሳ ቆፋ ጋርሳን

ኣማኒዛ ኣሳ ሎኦ ኦሶ

ዉርሴ ሳሮካ