ሌሚሶ ማጻፋ 9

ኣ ኤራቴኔ ኤያቴ

1ኣ ኤራቴያ

ባስ ኬ ኬጻዱስ፤

ኬስ ላፑን

ቱሳታ ኤሳዱስ።

2ኢዛ ሞ ሜሄ ሹካዱስ፤

ዎይኔ ኡሹ ኣጋዱስ፤

ማዳካ ጊጊሳዱስ።

3ሂስታዳ ኣሳ ጼይጋናስ

ባ ማጫ ኣይሌታ ኪታዱስ።

ኢዛ ካታማይፔ ቃ ሶን

ኤቃዳ ጼይጋዱስ፤

4«ኢንቴኖ! ኤራይ ፓጪዳይቶ

ሃ ጌሊቴ!» ጋዱስ።

ኤያታካ ኢዛ፥

5«ሃ ዪዲ ታ ቁማ ሚቴ፤

ታኒ ኣጊዳ

ዎይኔ ኡሻካ ኡዪቴ!

6ኢንቴ ኤያቴ ኦጌዛ ኣጊቴ፤

ኢንቴ ሼምፖራ ፓጻ ዴኣና፤

ኣኬካ ኦጌን ሄሜቲቴ» ጋዱስ።

7ቂልጪዛ ኣስ ሴሪዛ ኣሲ ኡባይ

ባስ ጫሼ ካላና፤

ኢታ ኣስ ዞሪዛዴይካ

ባስ ካዉያና።

8ቂልጪዛ ኣስ ዞሮፓ፤

ኔ ኢዛ ዞሪኮ ኢዚ ኔና ኢጻና።

ኣ ኤራንቻ ኣስ ሴራ፤

ኔ ኢዛ ሴሪኮ ኢዚ ኔና ዶሳና።

9ኣ ኤራንቻ ኣስ ታማርሳ፤

ሂስቲኮ ኢዚ ካሴይሳፌካ

ኣ ኤራንቻ ጊዳና።

ጺሎ ኣስ ታማርሳ፤

ሂስቲኮ ኢዚ ኤራቴ ጉጃና።

10ኣ ኤራቴስ ኮይሮይ

ጎዳስ ያሻቴ፤

ጌሻዛ ኤሮይካ ኣኬካ።1

11ታ ጋሶን ኔስ ባሬይ ኣዱቃና፤

ኔስ ዴኦ ላይይካ ጉጄታና።

12ኔኒ ኣ ኤራንቻ ጊዲኮ

ጎኤታና፤

ኔ ቂልጪዛዴ ጊዲኮ ቆሄታና።

13ኤያ ማጫሲ ዎጫማ ዳራዉስ፤

ኢዛ ባና ሃሩኩ፤

ኢዛ ኣይኮካ ኤሩኩ።

14ኢዛ ባ ካሬን ኡታ ፔኣዉስ፤

ካታማ ጊዶን ቃሶ

ኬዛ ኡታዉስ።

15ሄራ ኣ

ባ ኦጌ ቢዛይታ ጼይጋዉስ።

16ኢዛካ ዎዚና ፓጬታስ፥

«ኢንቴኖ! ኣኬካይ ፓጪዳይቶ

ታኮ ሃ ዪቴ።

17ካይሲ ኡዪዛ ሃ ማልኤስ፤

ጌማን ሚዛ ቁማይካ

ሱኬሴስ» ጋዉስ።

18ጊዶ ኣቲን ሃይቂዳ ኣሳይ

ሄን ዴኢዛይሳ፥

ኢዚ ኢማቲካ ዱፎ ጊዶን

ዲዛይሳ ኢስቲ ኤሬቴና።