ሌሚሶ ማጻፋ 25

ሶሎሞኔይ ጻፊዳ ሃራ ሌሚሶታ

1ዩሁዳ ካዎ ሂዝቂያሳ ኣሳቲ ዱቂዲ ጻፊዳ ሶሎሞኔ ሌሚሶቲ ሃይሳፌ ካሊዛይታ።

2ጹራ ጌንይ ጾሳስ ቦንቾ፤

ጹራ ፒልጊዲ ኬሶይ

ካዎታስ ቦንቾ።

3ሳሎታ ቃቴኔ

ሳኣ ጪማቴ

ኣሲ ጋኮንታይሳ ማላ፥

ካዎታ ቆፋካ ኣሲ ፒልጊ

ኤራናስ ዳንዳዬና።

4ቢራፔ ቂታ ዲጋይቻ፤

ዎጋጬይካ ቆጺዲ

ሎኦ ሚሽ ኬሳና።

5ካዎ ሲንፌ ኢታታ ዲጋይቻ፤

ሂስቲኮ ኢዛ ካዎቴ ኣራታይ

ጺሎቴን ሚኒ ኤቃና።

6ካዎ ሲንን ኔና

ቁ ቁ ሂስቶፋ፤

ጊታ ኣሳታ ጊዶን

ቤታናስ ኣሞቶፋ።

7ጊታ ኣሳ ሲንን

ኔና ካዉሻናፔ

ኢዚ ባርካ ኔና፥

«ሃይሶ ቁ ጋ»

ጊኮ ኔስ ሎኦ።1

8ኔ ኣይፌዛን ቤኢዳ ኡባ

ማርካታናስ ዱቡሻ

ባናስ ኤሶቶፓ፤

ኣይስ ጊኮ

ኔኒ ማርካታ ሲሚን፥

ሃራ ኣሲ ኔ ማርካቴይ

ባላ ጊዲዳይሳ ቆንጪሲኮ

ኔኒ ዬላታና።

9ኔሲኔ ኔ ላጌዛስ ጊዶን

ፓላማይ ሜቲኮ፥

ሄ ፓላማ ጋርሳን

ሃራ ኣሳ ጹራ ቆንጪሶፓ።

10ሂስቶንታ ኣጊኮ

ኔኒ ዮቲዛይሳ ሲዪዳ ኣሲ

ኔና ካዉሻና፤

ሄሳን ኔ ሱንይ

ናምኣን ሲሚዲ

ሎኦንታ ማላ ሞሬታና።

11ኮሺዛ ዎዴዛን

ሃሳዬቲዳ ሊኬ

ቃላይ ቢራ ቦላ ቲጌቲዳ

ዎርቃ ኣሌቆ ማላ።

12ኣ ኤራቴ ዲዛ ኣሲ

ዞሪዛ ዞሬይ ኤዝጊዛ ኣሳስ

ሃይን ኣዛ ዎርቃ ማላ፤

ዎይኮ ሙሩታ ዎርቃፌ

ኦሴቲዳ ኣሌቆ ማላ።

13ካ ሺሺዛ ዎዴ ኢርጻ ሃ

ኡዪን ኣሊዛ ማላ፤

ኣማኔቲዛ ኪታንቻይ

ባና ኪቲዛይታ ኡፋይሴስ።

14ኢሞንታይሳ፥ «ኢማና» ጊዲ

ጮ ፓፖቲዛ ኣሲ

ኢራይ ባይንዳ ሻራኔ ጫርኮ ማላ።

15ዳንዳያንቻ ኣሲ

ዴሬ ሃሪዛዴ

ዮቲ ማይዜስ፤

ሊቆ ቃላይ

ሜቄ ካን ጌሌስ።

16ኤስ ዴሚኮ ጊናራ ማ፤

ጊዶ ኣቲን ዳርሲኮ

ኔና ጹጋና።

17ኔና ኡፊዲ ኢጾንታ ማላ

ኔ ላጌ ሶ ኡባቶ ቦፓ።

18ባ ላጌዛ ቦላ ዎርዶራ

ማርካቲዛ ኣሲ ኮጼይ፥

ጊ ማሻይኔ ዎንዳፌይ

ኣስ ቆሂዛ ማላ ቆሄስ።

19ሜቶ ዎዴ ኣማኔቶንታ

ኣሳን ዜምፖይ፥

ቃጺዛ ኣቻን

ጮሚዛ ማላኔ

ሲሊዳ ቶሆን ሄሜቲዛ ማላ።

20ጬጪ ኡቲዳ ኣሳስ ማዛሙሬ ዬጼ

ሜጎ ጋላስ

ማይኦ ቃሪዛ ማላኔ

ማዱን ቦላ ጹጊዛ ሚሽ

ቲጊዛ ማላ።

21ኔ ሞርኬይ ጋፊኮ ሚዛ፤

ሳሜቲኮ ኡሻ።

22ኔኒ ሄሳ ኦኮ

ኢዛ ሁኤን ታማ ቦንቆ ካሺዲ

ቆሊዛዴ ማላ።

ጎዳይካ ኔ ኦሶስ

ዋጋ ኢማና።2

23ኣርሼይ ሞኪዛ ባጋ ጫርኮይ

ኢራ ኤሂዛ ማላ፥

ዚጊርሲ ሃንቆ ኤሄስ።

24ዱናማ ማቺራ

ኢሲ ኬን ዴኣናፔ

ኬ ዳራንቻን

ዴ ሎኦ።

25ዳቡርዳ ኣሲ ኢርጻ ሃ

ኡዪዲ ኣሊዛ ማላ

ሃኮ ቢታፌ ዪዛ

ሎኦ ቃላይ ኡፋይሴስ።

26ኢታ ኣሳ ሲንን

ኩንዲዛ ጺሎ ኣሲ

ቡልቆቲዳ ፑልቶኔ

ሞሬቲዳ ኦላ ሃ ማላ።

27ዳሮ ኤሳ ሙሲ ሎኦ ጊዴና፤

ሄሳካ ባስ ቦንቾ

ኮሺ ቦንቺሴና።

28ባና ሃሮንታ ኣሲ

ጊምቤይ ላሌቲዳ ካታማ ማላ።