ሌሚሶ ማጻፋ 23

1ኔኒ ዴሬ ሃሪዛይሳራ

ካ ማናስ ኡቲዳ ዎዴ፥

ኔ ሲንን ዴኢዛይሳ

ሎኤዳ ኣኬካ።

2ኔኒ ዳሮ ዮራ ኣስ ጊዲኮ፥

ኬሂፔ ናጌታ።

3ኢዚ ኔና ፓጫናስ

ዳንዳይዛ ጊሻስ፥

ሺቂዳ ማልኦ ቁማስ ዪቄቶፓ።

4ዱሬታና ጋዳ ዳቡሮፓ፤

ሃይሳ ማላ ቆፋ ኣጋናስ

ኣኬካንቻ ጊዳ።

5ሄሳ ማላ ዱሬቴ ቦላ

ኔኒ ኔ ኣይፌ ዎኮ

ሄራ ያና፤

ቄፌ ኬሲዳ ጎሌ ካፎ ማላ

ሳሎራ ፓላና።

6ኡዜ ኣሳ ካ ሞፓ፤

ማልኢዛ ኢዛ ካ

ማናስ ኣሞቶፋ።

7ቆፔ ቆሞን ኢዚ ኔና፥

«ማ፤ ኡያ» ጌሲፔ ኣቲን

ኢዛ ዎዚናይ ኔናራ ዴኤና።

8ኔኒ ሚዳ ጉ ካይካ

ኔና ጮሻና፤

ኔ ጋላታይካ ሃዳ ጊዳና።

9ኤያራ ሃሳዮፓ፤

ኣይስ ጊኮ

ኔ ኣ ኤራ ሃሳያ

ኢዚ ካና።

10ቤኒሶፌ ዲዛ ሳ ሾዶፋ።

ቃሴ ዪኦ ናይታ ጋዴ ሱጎፓ፤

11ኣይስ ጊኮ ኢስታ

ኣሺዛ ጎዳይ ሚኖ፤

ኢዚ ኢስታ ጊሻስ ኔናራ ሞቴታና።

12ኔ ዎዚና ዞሬስ፥

ኔ ሃይካ ኤራቴ

ቃላኮ ዛራ።

13ኔ ና ሴራናፔ ጉዬ ጎፓ፤

ኔኒ ቂርጩንቻን ሾጪኮ

ኢዚ ሃይቄና።

14ኔኒ ቂርጩንቻን ሾጫ፤

ኢዛ ሼምፖ ሃይቆፔ ኣሻ።

15ታ ናዞ!

ኔ ዎዚናይ ኣ

ኤራንቻ ጊዲኮ

ታ ዎዚናይካ ኡፋዬቴስ።

16ኔ ኢንጻርሳይ ሱሬ ሃሳይዛ ዎዴ

ታ ዎዚናይ ኡፋዬቴስ።

17ናጋራንቻታ ቦላ ቃናቶፓ፤

ጊዶ ኣቲን ኡባቶ ጎዳስ

ያሻቴ ኣጎፋ።

18ሂስቲኮ ኔስ ሲንፌ ኪያና፤

ኔ ሂዶታይ ሃዳ ጊዴና።

19ታ ናዞ! ሲያ፤ ዎዚናማ ጊዳ፤

ኔ ዎዚናይ ሱሬ ኦጌፔ

ካሬ ኬዞፖ።

20ዳሮ ዎይኔ ኡሹ ኡዪዛይታራኔ

ኣሾ ሙሳስ

ያሬቲዛይታራ ዙፔቶፓ።

21ኣይስ ጊኮ ማቲዛይቲኔ

ዮራቲ ማንቃና፤

ስኮ ዳሮይ ጫርቃ ማይዜስ።

22ኔና ዬሊዳ ኣዋይ ዮቲዛይሳ ሲያ፤

ኔ ኣዪያካ

ጬጊዳ ዎዴ ካፓ።

23ቱማ ሻማፌ ኣቲን

ሙሌካ ባይዞፓ፤

ኣ ኤራቴ፥ ሴራኔ

ኣኬካ ኔስ ሚሼ ኦ።

24ጺሎ ና ኣዋይ

ኬሂፔ ኡፋዬቴስ፤

ዎዚናማ ና ዬሊዳ ኣሲካ

ኢዛን ኡፋዬቴስ።

25ኔ ኣዋይኔ ኔ ኣያ ኡፋዬቴቶ፤

ኔና ዬሊዳራካ ኡፋዬቱ።

26ታ ናዞ!

ኔ ዎዚና ሃ ታኮ ዛራ፤

ኔ ኣይፌቲ ታ ኦጌፔ

ካሬ ኬዞፔቶ።

27ኣይስ ጊኮ ላይማ ማጫሳያ

ጪማ ኦላ ማላ፤

ላጌ ማቻ

ጹን ኦላ ማላ።

28ኢዛ ፓንጋ ማላ ዛማዳ ናጋዉስ፤

ኣማኔቶንታ ኣዴታ

ዴሬ ጊዶን ዳርሳዉስ።

29«ዎ!» ጊዛ ዋሶይ ኦሴ?

ጬጬይ ኦሴ? ኦሺ ኦሴ?

ዙዙን ኦሴ?

ጋሶይካ ባይንዳ

ማዱን ኦሴ?

ኣይፌይ ዞኢዛይ ኦሴ?

30ዎይኔ ኡሹ ኡዪሼ

ጋምኢዛይታስ ጊዴኔ?

ዋላኬቲዳ ዎይኔ ኡሹ

ዩዪ ዩዪ

ጋንጺዛይታስ ጊዴኔ?

31ዎይኔ ኡሺ ዞኢዳ ዎዴ፥

ኢዛ ሜይ ቢሪሌ ጊዶን

ጶሊዛ ዎዴ፥

ዱቂሺን ጮሮሩ ጊ ጌሊዛ ዎዴ

ኢዛ ቲሺ ሂስታ ጼሎፋ።

32ዉርሴን ኢዚ

ሾሻ ማላ ዱኬስ፤

ጎፔ ሾሻ ማላካ

ባ ዪሻ ፑኬስ።

33ኔ ኣይፌይ ቤዪ ኤሮንታዝ ቤያና፤

ኔ ዎዚናይካ ኤሉሜታና።

34ኔኒ ኣባ ጊዶን ዲዛ

ማርካቤ ጼራን

ኢቺዳ ኣሳ ማላ ጊዳና።

35ኔኒ፥ «ኢስቲ ታና ዴቺዳ፤

ጊዶ ኣቲን ታኒ ቆሄታቤኬ፤

ኢስቲ ታና ዋዳ፤

ጊዶ ኣቲን ታስ ኤሬቲቤና።

ሃራ ኡሻ ኡያናስ

ታኒ ኣዉዴ

ዴንዳንዲናሻ?» ጋና።