ሌሚሶ ማጻፋ 20

1ማሲዛ ኡሺ ኡዪዛይ

ቂልጪዛዴኔ ኤያ ጊዴስ፤

ሃይታንታን ባሌቲዳ ኡባይ

ኣ ኤራንቻ ጊዴና።

2ካዎ ሃንቆይ ጋሞ ጻጎ ማላ፤

ኢዛ ዪሎቺዛይ

ባ ሼምፖ ቦላ ፒርዴስ።

3ፓላማፔ ሃኮይ

ኢዛዴስ ቦንቾ፤

ጊዶ ኣቲን ኤያ ኣሲ ኡባይ

ኦሻስ ኤሶቴስ።

4ኣዛላ ጎሻንቻይ

ዎዴራ ጎዬና፤

ካ ሺሺዛ ዎዴ

ሺሻናስ ኮዬስ፤

ጊዶ ኣቲን ኣይኮካ ዴሜና።

5ኣሳ ዎዚና ሃልቾይ

ጪማ ኦላን ዴኢዛ

ሃ ማላ፤

ጊዶ ኣቲን ዎዚናማ ኣሲ

ሄፔ ዱቂ ኬሴስ።

6ዳሮ ኣሳቲ ባንታ

ኪያቴ ዮቴቴስ፤

ጊዶ ኣቲን ኣማኔቲዛ ኣስ

ኦኒ ዴማናስ ዳንዳይዜ?

7ጺሎ ኣሲ ቦሬይ ባይንዳ ዴኦ ዴስ፤

ኢዛፔ ካሊዲ

ኢዛ ናይቲካ ኣንጄቲዳይታ።

8ካዎይ ፒርዳናስ ባ ካዎቴ

ኣልጋን ኡቲዛ ዎዴ

ኢታ ኡባ ባ ኣይፌታን

ሃርቂዲ ኬሴስ።

9«ታ ዎዚና ጌሻዲስ፤

ታ ጌሻ፤

ታናን ናጋራይ ባዋ»

ጋናይ ኦኔ?

10ጎዳይ ዎርዶ ሜዛኔኔ

ናምኡ ቆሞ ጌዳራ

ሚሽ ኢጼስ።

11ናይ ጌሺኔ ሱሬ ጊዲዛይሲ

ኢዚ ኦዛ ኦሶን ኤሬቴስ።

12ሲዪዛ ሃይኔ ጼሊዛ ኣይፌ፥

ኢስታካ ጎዳይ ሜዴስ።

13ስኮ ሲቆፓ!

ኔ ሂስቶንታ ኣጊኮ ማንቃና።

ሚናዳ ኦ፤

ሂስቲኮ ኔኒ ካ ካላና።

14ሻሚዛ ኣሲ፥

«ሃይሲ ኣልኦ! ቆሄስ!» ጌስ፤

ጊዶ ኣቲን ሻሚ

ሲሚዳፔ ጉዬን፥

«ሂራይሶን ሻማዲስ»

ጊዲ ጬቄቴስ።

15ኤራይ ኩሚዳ ቃላ ሃሳይዛ

ሜቴርሻቲ ዎርቃፌኔ

ዞኦ ኢንቁፌካ

ኣ ጌጼ።

16ኤሮንታ ኣሳስ

ዋሴ ጌሊዛ ኣሳ ማይኦ

ቃሪ ኤኪቴ፤

ሃዉሻ ማጫሳስ

ዋሴ ጌሊዛ ኣስ ኦይኪቴ።1

17ዎርዶን ዴሚዳ ካ ማልኤስ፤

ጊዶ ኣቲን ኣቂ ፔኢዲ

ዶናን ኣጬ ጊዴስ።

18ዞሬ ኤካዳ ሃልቾ ሃልቻ፤

ዞሬ ኤኮንታ ዴኣሼ

ኦላስ ቦፓ።

19ዚጊራንቻይ ጹራ ላሌስ፤

ሄሳ ጊሻስ ሎምኡሎምኣ

ኣሳፔ ሃካ።

20ባ ኣዋ ዎይኮ

ባ ኣዮ ጫዪዛዴስ፥

ጾምፔይ ሳካና

ማን ቶኣና።

21ኮይሮራ ኤሶን ቤቲዳ ኣቆታስ

ዉርሴን ኣንጆይ ዴና።

22ኔሲ ኢታ ኦዳ ኣሳስ፥

«ታኒ ኢዛስ ሃሎ ኬሳና» ጎፓ፤

ጎዳን ኣማኔታዳ ናጋ፤

ኢዚ ኔና ኣሻና።

23ጎዳይ ዎርዶ ሜዛኔን

ኡፋዬቴና

ናምኡ ቆሞ ጌዳራ

ሚሽ ኢጼስ።

24ኣሳይ ባናስ ቤሲዛ ኦጌ

ጎዳይ ካሌስ፤

ሂስቲን ኣሲ ባርካ

ባ ባና ኦጌ

ዎስቲ ኣኬካናስ ዳንዳይዜ?

25ኢሲ ሚሽ ኤሶቲዲ፥

«ሃይሳ ታኒ ጾሳስ ኢማና»

ጊዲ ኣዲኔቲዳፔ ጉዬ

ዚልኤቴ ኣስ ኦይኪዛ ያርዴ።

26ኣ ኤራቴ ዲዛ ካዎይ

ማካላንቻታ ሻኪ ኤሬስ፤

ኢዚ ኢስታ ቃቶንታ ቃጻዬስ።

27ኣሳ ኣያናይ ጎዳ ጾምፔ፤

ሄሳ ጊሻስ

ጊዶ ኣሳቴ ኡባ

ኢዚ ፒልጊ ጼሌስ።

28ኪያቴኔ ቱማቴ

ካዎ ናጌቴስ፤

ኢዛ ካዎቴ ኣራታይካ

ሲቆን ሚኔስ።

29ዬላጋታ ዎልቃይ ኢስታስ ቦንቾ፤

ጪማታ ፑሉን

ኢስታስ ቦንቾ።

30ሚኖ ቂጻቴይ ኢታቴ ዲጌስ፤

ዋይ ኢታ ዎዚና ላሜስ።