ሌሚሶ ማጻፋ 16

1ኣሲ ባ ዎዚናን ሃልቼስ፤

ጊዶ ኣቲን ዛሮይ

ጎዳፔ ቤቴስ።

2ኣሲ ቢዛ ኦጌ ኡባይ

ኢዛስ ሎኦ ሚሳቴስ፤

ጎዳይ ኮይሮ ዴን ቆፋ

ጫዲ ጼሌስ።

3ኔ ኦዛ ኡባ ሃዳራ

ጎዳስ ኢማ፤

ሂስቲኮ ኔ ሃልቾይ ፖሌታና።

4ጎዳይ ኡባ ሚሽ

ሜዳ ጋሶይካ ዴስ፤

ማካላንቻታ ጊዲኮካ

ባሻ ጋላሳስ

ጊግሲ ዎዴስ።

5ጎዳይ ኦቶሬቲዛ

ኡባ ሻቴቴስ፤

ኢስቲ ቃጻዬቶንታ ኣቴቴና።

6ሲቆኒኔ ኣማኔቴን

ናጋራይ ኣቶ ጌቴቴስ፤

ጎዳስ ያሻቴን

ኣሲ ኢታፔ ሃኬስ።

7ኣሳ ሄሜታይ

ጎዳ ኡፋይሲዛዝ ጊዲኮ

ኢዛ ሞርኬቲ

ኢዛራ ሳሮ ዳና ማላ ኦስ።

8ጺሎቴን ቤቲዛ

ጉ ሚሺ

ዎርዶራ ዴሚዛ

ዳሮ ዎፔ ኣስ።

9ኣሲ ባ ዎዚናን

ባ ኦና ሚሽ ሃልቼስ፤

ሃልቾዚ ጎዳይ ጊኮ

ፖሌቴስ።

10ካዎ ሜቴርሻቲ

ጾሳፌ ኤኪዳ ማታን

ሃሳዬቴስ፤

ኢዛ ኢንጻርሲ

ፒርዳ ጌላሳናስ ቤሴና።

11ሱሬ ጌዳራቲኔ

ማካ ሚሻቲ ጎዳፔ፤

ካራጺቴ ጊዶን ዲዛ ጌዳራቲ

ኡባይ ኢዛ ኦሶታ።

12ካዎቲ ኢታ ኦሶ ሃራሴቴቴስ፤

ኣይስ ጊኮ ካዎቴ ኣራታይ

ጺሎቴን ኤቄስ።

13ጺሎ ሃሳያን ካዎቲ ኡፋዬቴቴስ፤

ቱማ ሃሳይዛይታካ ዶሴቴስ።

14ካዎ ሃንቆይ

ሃይቆ ኪታንቻ ማላ፤

ኣ ኤራንቻይ ጊዲኮ

ሃንቆ ኢርጺሴስ።

15ካዎይ ፓሽኪ ጊሺን ዴኦይ ዴስ፤

ኢዛስ ኪያቴ

ኢራ ቶኪዳ ባሳ

ሻራ ማላ።

16ኣ ኤራቴ ዴሞይ

ዎርቃ ዴሚዛይሳፌ ኣስ፤

ኣኬካ ዴሞይ

ቢራ ዴሞፔካ ኣስ።

17ሱሬታ ኦጌይ ኢታታፔ ሃኮን ዴስ፤

ባ ሄሜታ ናጊዛ ኣሲ

ባ ሼምፖ ናጌስ።

18ኦቶሮ ጌዶ ባሺ ካሌስ፤

ሃላጫ ጌዶካ

ኩንዴ ካሌስ።

19ኦቶራንቻታራ ዙፔቲዲ

ዲኢ ኤሂዳ ሚሽ

ሻኬቲ ኤካናፔ

ማንቆታራ ማንቄቴን

ዱሲ ኪያ።

20ዞሬ ኤኪዛ ኣሲ ዱሬቴስ፤

ጎዳን ኣማኔቲዛ ኣሲ

ኣንጄቲዳዴ።

21ዎዚናን ኣ ኤራንቻ ጊዲዳ

ኣሳቲ ኣኬካንቻ

ጌቴቴቴስ፤

ሎኦ ቃላይ ኤራቴ ጉጄስ።

22ባስ ሚሽ ኦዳዴስ

ኣኬካይ ዴኦ ፑልቶ፤

ዶጋታስ ጊዲኮ

ኤያቴ ሃንቆ ኤሄስ።

23ኣ ኤራንቻ ዎዚናይ

ኢዛ ዶና ካሌስ፤

ኢዛ ሜቴርሻቲካ

ኤራቴ ጉጂ ጉጂ ቤቴስ።

24ሎኦ ቃላይ

ኤሳ ኢሊሎ ማላ ማልኤስ፤

ቦላካ ማዴሲኔ

ፓስ።

25ኣሳስ ሱሬ ሚሳቲዛ ኦጌይ ዴስ፤

ጊዶ ኣቲን ዉርሴን

ሃይቆስ ጋስ።1

26ካ ኮሺ

ኣሲ ሚኒ ኦና ማላ ዴንስ፤

ጋፋይካ ኦሶስ

ሚንስ።

27ኢታ ኣሲ ኢታቴ ቆፔስ፤

ኢዛ ሃሳያይካ ጹጊዛ ታማ ማላ።

28ጌላ ኣሲ ኦሽ ዴንስ፤

ዚጊርሲ ኣማኔቲዛ

ላጌታ ሻኬስ።

29ጌኔ ኣሲ ባ ሾሮዛ ጪሜስ፤

ሎኦ ጊዶንታ ኦጌ

ኢዛ ካሌስ።

30ኣይፌራ ቂምኦቲ ቤሲዛ ኣሲ

ጌላቴ ቆፔስ፤

ባ ሜቴርሻ ሳጺዛ ኣሲ

ኢታሶ ቤስ።

31ፑሉን ቦንቾ ካላቻ፤

ሄሲ ጺሎቴ

ዱሳን ቤቴስ።

32ዎልቃማ ኣስ ጊዳናፔ

ዳንዳያ ኣስ ጊዴ ሎኦ፤

ባና ሃሪዛዴይ ካታማ ዎልቃን

ሃሪዛዴፌ ኣስ።

33ኣሲ ሳማ ዬጌስ፤

ጊዶ ኣቲን ዉርሴ ፖሎ

ኢሚዛይ ጎዳ።