ጌሻ ማጻፋ
ናሂሚያ ማጻፋ 9
ኢስራኤሌ ኣሳይ ባ ናጋራ ፓጼ
ሄ ኣጊናን ናምኡ ታማኔ ኦይዳን ጋላስ ኢስራኤሌ ኣሳይ ኢሲ ቦላ ሺቂዲ ባ ናጋራ ጊሻስ ኬሂ ሞቲዳይሳኔ ጬጪዳይሳ ቆንጪሲናስ ማቃ ማይኢዲ ባ ሁኤ ቦላ ጉዱላ ላሊዲ ጾሚዴስ። ኢስራኤሌ ኣሳይ ኣላጋ ኣሳ ኡባፌ ባና ሻኪዴስ፤ ሄሳፌ ጉዬ ኣሳይ ዉሪ ዴንዲ ኤቂዲ ኢስቲኔ ካሴ ኢስታ ኣዋቲ ኦዳ ናጋራ ኡባ ፓጺዳ። ሄን ኢስቲ ኤቂዳ ማላ ዲሺን ኢስታ ጾሳ ዎጋ ማጻፋይ ሄ ሳቴ ኩሜ ኢስታስ ናባቤቲዴስ፤ ቃሴ ሃራ ሄ ሳቴ ኩሜ ኢስቲ ባ ናጋራ ፓጺሼ ጎዳስ ባ ጾሳስ ሆኪ ጎይኒዳ። ሌዌ ባጋታስካ ኤቂዛ ማዲራኬይ ዴስ፤ ሄ ማዲራኬዛ ቦላ ኢያሶይ፥ ባኔይ፥ ቃዲምኤሌይ፥ ሼባኒያይ፥ ቡኔይ፥ ሼሬቢያይ፥ ባኔይኔ ካናኔይ ኤቂዲ ባ ቃላ ቁ ሂስቲዲ ጎዳ ባንታ ጾሳኮ ዎሲዳ። ኢያሶ፥ ቃዲምኤሌ፥ ባኔ፥ ሃሻቢናዬ፥ ሼሬቢያ፥ ሆዲያ፥ ሼባኒያኔ ፓታያ ጌቴቲዛ ሌዌ ባጋ ኣሳቲ፥
«ኢንቴ ዴንዲ ኤቂዲ ሜርና ጎዳ
ኢንቴ ጾሳ ጋላቲቴ፤
ጋላታፔኔ ኣንጆፌ
ቁ ቁ ጊዳ
ቦንቼቲዳ ጾሳ ሱን
ሳቢቴ» ጊዳ።
ማሬታና ዎሲዳ ዎሳ
ሄሳፌ ጉዬ ኢስራኤሌ ኣሳይ፥
«ጾሶ፥ ኔ ጻላ ጎዳ፤
ሳሎኔ ሳሎ ቦላ ዲዛይታ፥
ሳኣኔ ሳኣ ቦላ ዲዛይታ፥
ጊታ ኣባኔ ኢዛ ጊዶን ዲዛይታ
ኡባ ሜዳይ ኔና።
ኡባስ ዴኦ ሼምፖ ኢማዳሳ፤
ሳሎ ሜቴቲ ኡባይ
ኔስ ጎይኔቴስ።
ጎዳዉ፥ ኔኒ ጾሳ!
ኔኒ ኣብራሜ ኡሬ ጌቴቲዛ
ካላዳዌ ዴሬፔ ዶራዳ
ጼይጋ ኬሳዳሳ፤
ኢዛ ሱንካ
ኣብራሃሜ ጋዳሳ።1
ኢዚ ኔስ ኣማኔቲዳ ኣስ
ጊዲዳይሳ ቤያዳ
ኢዛራ ጫቄታዳሳ፤
ካናኔ ኣሳይ፥ ሂቴ ኣሳይ፥
ኣሞሬ ኣሳይ፥
ፓሪዜ ኣሳይ፥ ያቡሴ ኣሳይኔ
ጌርጌሴ ኣሳይ
ኢዛን ዲዛ ቢታ፥
ኢዛ ዜሬታስ
ዱሳ ቢታ ጊዳና ማላ
ላቲሳናስ ጫቆ
ቃላ ጌላዳሳ፤
ኔኒ ጺሎ ጊዲዳ ጊሻስ
ኔ ጫቆ ቃላ ሚን ናጋዳሳ።2
«ኔኒ ኑ ኣዋታ ቦላ
ካሴ ጊብጼ ቢታን ጋኪዳ
ዋዬዛ ቤያዳሳ፤
ኢስቲ ዞኦ ኣባ ማታን ዲሼ
ማዶ ኮዪዲ
ኔና ዎሲዳ ዎሳ ሲያዳሳ።3
ጊብጼ ካዎ ቦላ፥
ሹሜታ ቦላኔ
ሄ ቢታን ዲዛ ኣሳ
ኩሜ ቦላ
ጊታ ማላታታ ቆንጪሳ ቤሳዳሳ።
ሄሳ ኔ ኦዳይ ካሴ ኑ ኣዋታ
ጊብጼ ኣሳይ ኣይ ማላ ኢስታስ
ሜንጼ ኢቲዲ ዋዪሲዳኮ
ኔ ቤኢዳ ጊሻሳ፤
ኔ ሄሳ ኦይሳ ጋሶን
ሃች ጋካናስ
ኔ ሱንይ ቦንቾን
ጼይጌታና ማላ ኦዳሳ።4
ኢስታ ሲንን ኣባ
ናምኡ ኬሳ ሻካዳ፥
ሜላ ቢታራካ
ኢስታ ፒንዳሳ፤
ሹች ዱጌ ጪማ ሃ
ጊዶን ዬጊዛ ማላ
ኢስታ ጎዲዛይታ ጪማ
ሃ ጊዶ ዬጋዳሳ።5
ጋላስ ቱሳ ማላ ኤቂዳ ሻራን፥
ኦማርሲ ቱሳ ማላ
ታማን ፖኢሳዳ
ኢስቲ ባናስ ቤሲዛ ኦጌራ
ባና ማላ ካሌዳሳ።6
«ሳሎፔ ዱጌ
ሲና ዙማ ቦላ ዎዳ
ኔ ዴሬዛ ሃሳይሳዳሳ፤
ሎኦ ዎጋታኔ ሱሬ ቲሚርቴታ
ኔ ኢስታስ ኢማዳሳ።
ጌሻ ኔ ሳምባታ
ኢስቲ ቦንቻና ማላ
ታማርሳዳሳ፤
ኔ ኣዛዞታ፥ ዎጋታኔ ማራታ
ኔ ኦሳንቻ ሙሴ ባጋራ
ኢስታስ ኢማዳሳ።7
ኢስቲ ጋፌቲዳ ዎዴ
ሳሎፔ ካ ኢማዳሳ፤
ኢስቲ ሳሜቲዳ ዎዴ ሃ
ዛላፌ ኢስታስ ፑልቲሳዳሳ፤
ቃሴ ኔ ኢስታስ ኢማና ጋዳ
ጫቂዳ ቢታ ጌሊዲ
ኤካና ማላ ኣዛዛዳሳ።8
«ካሴ ኑ ኣዋቲ ኦቶራንቻኔ
ዎዚና ሙሜ ጊዲዳ ጊሻስ
ኔ ኣዛዞ ናጊቤቴና፤
ኔስ ኣዛዜቲቤቴና፤
ኔ ኢስታስ ኦዳ ጊታ
ማላታካ ኡባ ዶጊዳ፤
ዎዚና ሙሜ ጊዲዳ፤
ቃሴ ጉዬ ጊብጼ ኣይሌቴን
ዛራና ማላ
ባንታና ካሌዛ
ኣስ ዶሪዳ።
ጊዶ ኣቲን ኔኒ ሲቆን
ኩሚዳ ጾሳ፥
ሃንቆስ ታኪዛ ጾሳ፥
ኣቶ ጊዛ ጾሳ፥
ኪያኔ ማሪዛ
ጎዳ ጊዲዳ ጊሻስ
ኔ ኢስታ ኣጋቤካ።9
ማራ ሌሚሶን ባስ ኤቃ ጾስ ኦዲ፥
‹ጊብጼ ቢታፌ
ኑና ካሌዲ ኬሲዳ
ጾሲ ሃይሳኮ!› ጊዳ።
ኔ ሱንካ ኣይ ማላ
ሞሮ ሞሪዶ!10
«ኔ ማሮታይ ጊታ ጊዲዳ ጊሻስ
ኢስቲ ሄን ባዞ ቢታን ዪ
ኣታና ማላ ኣጋቤካ፤
ጊዶ ኣቲን ኢስቲ ጋላስ
ቱሳ ማላ ሻራን
ኦማርስ ቱሳ ማላ ታማን
ኢስቲ ባናስ ቤሲዛ ኦጌራ
ኢስታ ካሌ ኣጋቤካ።
ሎኦ ጊዲዳ ኔ ኣያና
ኢስታ ታማርሳና ማላ ኢማዳሳ፤
ኢስታስ ማና ማላ ማና፥
ኡያና ማላ ሃ ኢማዳሳ።
ኦይዱ ታሙ ላይ ኩሜ
ኢስታ ባዞ ቢታን ማዳዳ
ኢስታስ ኮሺዛ ሚሼ
ኢሲኖካ ዲጋቤካ፤
ኢስቲ ማይኢዳ ማይኦይ
ዉሪቤና፤
ቃሴ ኢስታ ቶሆይካ
ፑሪቤና።
«ኢስታ ዴራ ዩዪ
ኣ ዲዛ ዴሬታኔ
ኢስቲ ካዎቴታ ኡባ
ጾኒዲ ሄ ቢታ
ኤካና ማላ ኦዳሳ፤
ሄሳ ጊሻስ
ካዎ ሲሆኔይ ኣይሲዛ
ሃሴቦኔ ጌቴቲዛ ቢታኔ
ካዎ ኣጌይ ኣይሲዛ
ባሳኔ ጌቴቲዛ ቢታ
ጾኒዲ ላቲዳ።11
ኢስታስ ቆዳይ ሳሎ ጾሊንቴ ማላ
ዳሪዳ ናይታ ኢማዳሳ፤
ካሴ ኢስታ ኣዋታስ ኔ ኢማና ጋ
ቃላ ጌሊዳ ቢታ
ኢስቲ ጾኒ ላታና ማላ
ኦዳሳ።12
ኢስታ ናይቲ ካናኔ ቢታ
ጾኒ ላቲዳ፤
ሄ ቢታን ዲዛ ኣሳታ
ኔኒ ጾናዳሳ፤
ኢስታ ካዎታ ቦላኔ ካናኔ
ቢታን ዲዛ ኣሳታ ቦላ
ባ ዶሲዳ ማላ ኦና ማላ
ዎልቃ ኢማዳሳ።13
ቃሴ ሎኢ ጊምቤቲዳ
ካታማታኔ ኣራዳ ቢታ፥
ሎኦ ሚሽ
ኢስታን ኩሚዳ ኬታ፥
ሃ ኦላታኔ
ዎይኔ ኣታኪልቴይ ቶኬቲዛ ጋዴ፥
ዎጋራ ሚታኔ ዳሮ ኣይፌ
ኣይፊዛ ሚታ ላቲዳ፤
ሚዲኔ ኡዪዲ ሞዳ፤
ኔኒ ኔ ኪያቴን ኢሚዳ ሎኦ ሚሻን ዉሪ ኡፋዬቲዳ።14
«ጊዶ ኣቲን ኢስቲ ኔ ቦላ ማካሊዳ፤
‹ኔ ቃላስካ ኣዛዜቶኮ› ጊዳ፤
ኔ ዎጋ ሲዮኮ ጊዲ
ኔስ ዞኮ ዛሪዳ፤
ቃሴ ኢስቲ ኔኮ ዛራና ጊዲ
ሴሪ ታማርሲዳ ናቤታ ዎዳ፤
ኡባ ዎዴ ኔ ቦላ
ጫሻ ቃላ ሃሳይዳ።
ሄሳ ጊሻስ ኢስታ ሞርኬቲ
ኢስታ ጾኒዲ ሃራና ማላ
ኣ ኢማዳሳ፤
ሞርኬቲካ ኢስታ ሜቶዳ፤
ኢስቲ ባንታና ሜቲዳ ዎዴ
ኔኮ ዋሲዳ፤
ኔካ ኢስታ ዋሳ
ሳሎን ዳዳ ሲያዳሳ፤
ኔ ማሮቴ ጊታቴፌ ዴንዲዳይሳን
ኢስታ ሞርኬታፔ ኣሻና
ካሌዛይታ ዬዳዳሳ።
«ጊዶ ኣቲን ሳሮ ዴሚዳ ዎዴ
ቃሴካ ሲሚ ናጋራ ኦዳ፤
ሄሳ ጊሻስ ኔ ኢስታ ሞርኬታስ
ኣ ኢማዳሳ፤
ኢስታ ሞርኬቲካ ኢስታ ሃሪዳ፤
ጊዶ ኣቲን ኔ ማዳና ማላ ጊዲ
ኔኮ ሲሚ ዎሲዳ ዎዴ
ሳሎን ዳሼ ኢስታ ዎሳ ሲያዳሳ፤
ኔኒ ኔ ቃቴፌ
ዴንዲዳይሳን
ኢስታ ኡባ ዎዴ ማዳዳሳ።15
ኔ ቃላኮ ሲማና ማላ
ኔኒ ኢስታ ሴራዳሳ፤
ጊዶ ኣቲን ባ ኦቶሮቴፌ
ዴንዲዳይሳን
ኔ ኣዛዞታ ካዳ፤
ኢስቲ ኣዛዜቲዳኮ
ኢስታስ ዴኦ ኢሚዛ
ኔ ዎጋታ ቦላ ናጋራ ኦዳ።
ኢስታ ዎዚናይ ሙሚዳ ጊሻስ
ባ ሲን ሃራሶ ዛሪዳ፤
ቃሴ ባ ዎዚና ሙሚሲዲ
ኔ ኣዛዞታ ኢጺዳ።16
ዳሮ ላይ ኔ ኢስታ ዳንዳያዳሳ፤
ኢስታ ታማርሳና ማላ ናቤታ
ኔ ኣያናን ኢስታስ ዴንዳሳ፤
ጊዶ ኣቲን ኢስቲ ሎኤ
ሲዪቤቴና፤
ሄሳ ጊሻስ ኢስታ ዴሬ
ማታን ዲዛ ኣሳቲ
ጾናና ማላ
ኢስታ ኣ ኢማዳሳ።17
ጊዶ ኣቲን ኔ ማሮቴ
ጊታቴፌ ዴንዲዳይሳን
ኢስታ ኣጋቤካ፤
ኔ ኪያኔ ኣቶ ጊዛ
ጾሳ ጊዲዳ ጊሻስ
ኢስታ ይሳቤካ።
ጊታ፥ ዎልቃማኔ ያሺዛ
ኑ ጾሳዉ!
ኔኒ ኔ ጫቆ ቃላኔ ሜርና ጋካናዉ ዲዛ
ኔ ሲቆ ናጋሳ፤
ኑ ቦላ፥ ኑ ካዎታ ቦላኔ
ኑና ካሌዛይታ ቦላ
ኑ ቄሴታ ቦላኔ ኑ ናቤታ ቦላ
ኑ ኣዋታ ቦላ፥
ቃሴካ ዴሬ ኡባ ቦላ፥
ኣሶሬ ካዎታፔ ዶሚዲ
ሃች ጋካናስ ጋኪዳ ሜቶ
ኡባ ኔ ቆፓ።18
ኔ ኑና ቃጻያና ጋዳ
ኔ ኦዳይሲ ዉሪ ሊኬ፤
ኑኒ ናጋራ ኦኮካ
ኔኒ ኔ ኣማኔቴን
ሚና ኤቃዳሳ።
ካሴ ኑ ኣዋቲኔ
ኑ ካዎቲ፥
ኑና ካሌዛይቲኔ ኑ ቄሴቲ
ኔ ዎጋ ናጊቤቴና፤
ቃሴ ኔ ኢስታስ ኢሚዳ
ኣዛዞታኔ
ሴራ ዞሬ ሲዪቤቴና።
ኔ ኢስታ ካዎቴን
ኢስታስ ጊታ ኣንጆ ኢማዳሳ፤
ኣራዳኔ ኣሆ ቢታ
ኢስታስ ኢማዳሳ፤
ጊዶ ኣቲን ኢስቲ
ባ ናጋራፔ ሲሚዲ
ኔስ ጎይኒቤቴና።
ሄሳፌ ዴንዲዳይሳን
ኔ ኑ ኣዋቲ
ኣይፌዮ ማና ማላኔ
ሎኦ ሚሻን ኡፋዬታና ማላ
ኔ ኢስታስ ኢሚዳ ቢታን
ሃች ኑ ኣይሌ ጊዲዶስ።
ኑኒ ናጋራ ኦዳ ጋሶን
ኔኒ ኑ ቦላ ካዎዳ ካዎቲ
ኑ ቢታ ኣንጆ ኡባ
ኢስቲ ጎኤቴቴስ፤
ቃሴ ኑ ቦላኔ ኑ ሜሄታ ቦላ
ባ ኮዪዳ ማላ ኦቴስ፤
ሄሳፌ ዴንዲዳይሳን
ኑኒ ሃኢ ጊታ ዋዬ ቦላ ዶስ።
ኣሳይ ቃቺዳ ቃላ ፒርማን ቆንጪሴ
«ሃኒዳ ዮኦ ኡባስ ኑኒ ኢስራኤሌ ኣሳይ ቃላን ጋጊዳይሳ ጻፊ ዎናስ ቃላ ቃቺዶስ፤ ኑ ቃቺን ጻፌቲዳ ቃላ ቦላ ኑና ካሌዛይቲ፥ ሌዌ ባጋቲኔ ኑ ቄሴቲ ባ ማታሜ ሾጪዳ» ጊዳ።
Source notes (18)
- Cross-reference ሜ 11፡31—12፡1፤ 17፡5
- Cross-reference ሜ 15፡18-21
- Cross-reference ኬሳ 3፡7፤ 14፡10-12
- Cross-reference ኬሳ 7፡8—12፡32
- Cross-reference ኬሳ 14፡21-29፤ 15፡4-5
- Cross-reference ኬሳ 13፡21-22
- Cross-reference ኬሳ 19፡18—23፡33
- Cross-reference ኬሳ 16፡4-15፤ 17፡1-7፤ ዛሬ 1፡21
- Cross-reference ኬሳ 34፡6፤ ታይ 14፡18
- Cross-reference ኬሳ 32፡1-4
- Cross-reference ታይ 21፡21-35
- Cross-reference ሜ 15፡5፤ 22፡17፤ ኢያ 3፡14-17
- Cross-reference ኢያ 11፡23
- Cross-reference ዛሬ 6፡10-11
- Cross-reference ዳና 2፡11-16
- Cross-reference ሌዌ 18፡5
- Cross-reference 2ካዎ 17፡13-18፤ 2ታሪ 36፡15-16
- Cross-reference 2ካዎ 15፡19፥29፤ 17፡3-6፤ ኢዝ 4፡2፥10
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.