ጌሻ ማጻፋ
ሚኪያሳ ቲንቢቴ 3
ኢታ ኦጌ ካሌዛይታኔ ዎርዶ ናቤታ ቦላ ጾሳ ሃንቆ
ቃሴካ፥ «ኢንቴኖ ያቆቤ ካሌዛይታኔ ኢስራኤሌ ኬ ኣሳ ሃሪዛይቶ ሲዪቴ፤
ኢንቴ ቱሙ ፒርዳ ኤራናስ
ኢንቴስ ቤሴኔ?
ኢንቴ ሎኦ ኢጺዴታ፤
ኢታ ቃሴ ዶሲዴታ፤
ታ ኣሳ ጋልባ ሾቂዴታ፤
ኢስታ ኣሾካ
ሜቄፌ ሻኪዴታ።
ታ ኣሳ ኣሾ ሚዴታ፤
ጋልባካ ሾቂዴታ፤
ኢስታ ሜቄካ
ሜንሬዴታ፤
ኣሾ ጫጪዛ ባሼን
ጫጪዛ ማላኔ
ዲስቴን ዶይሲዛ ኣሾ ማላ
ቃንጼሬዴታ» ታ ጋዲስ።
ኢስቲካ ፑዴ ጾሳኮ
ዋሳና ሺን
ጾሲ ኢስታ ዋሶ ሲዬና፤
ኢታቴ ጊሻስ ሄ ዎዴ
ጾሳይ ባ ኣይፌሶ
ኢስታፌ ሃራሶ ዛራና።
ጾሲ፥ «ታ ዴሬ ባሌዛ ናቤቲ
ኣሲ ኢስታ ሚዚኮ፥
‹ሳሮቴ ዴስ› ጌቴስ።
ሙዞንታ ኣጊኮ ቃሴ፥
‹ኦላይ ዬስ›
ጊ ኣዋጃናስ ዴንዴቴቴስ።
ሄሳ ጊሻስ ኢስታ ቦላ
ቃማይ ቤቶንታ፥
ማይ ኤሮንታ ጋኪ
ዎና፤
ናቤታ ቦላ ኣርሼይ ጌላናኔ
ጋላሳይ ኢስታስ ቃማና።
ቡሮ ማሮቲዛይቲ ካዉያና፤
ቲንቢቴ ዮቲዛይቲ ዬላታና፤
ዉሪካ ባ ኣይፌሶ ካማና፤
ጋሶይካ ኢስታስ ዛሮይ
ጾሳ ኣቻፌ ባይንዳ
ጊሻሳ» ጊዴስ።
ታ ቃሴ ያቆቤስ
ኢዛ ቆሆዛ፥
ኢስራኤሌሲካ
ኢዛ ናጋራ ዮታናስ
ዎልቃን፥ ጾሳ ኣያናን፥
ቱማ ፒርዳኒኔ
ሚኖቴን ኩማዲስ።
ኢንቴኖ ያቆቤ ሶ ኣሳ
ካሌዛይቶ!
ኢንቴኖ ኢስራኤሌ ዴሬ ሃሪዛይቶ!
ቱሙ ፒርዳ ካዛይቶ!
ቱሙ ጊዲዳዝ
ኡባ ሚርቂዛይቶ!
ኣኔ ሲዪቴ።
ጺዮኔ፥ ኣሳ ሱ ጉሶኒኔ
ዬሩሳላሜ ኢታቴን
ኩንዛይቶ!
ኣኔ ሲዪቴ።
ካሌዛይቲ ማታኤስ ፒርዴቴስ፤
ቄሴቲ ሚሻ ጊሻስ
ታማርሴቴስ፤
ናቤቲካ ሚሼ
ሚዳ ጊሻስ ዮቴቴስ።
ሄሳ ኡባ ኦዲካ፥
«ጾሲ ኑ ጊዶን ዴስ ጊዴኔ?
ኣይ ኢታይካ ኑ ቦላ ጋኬና» ጊሼ
ጾሳን ጬቄቴቴስ።
ሄሳ ጊሻስ ኢንቴ ጌዶን
ጺዮኔይ ጎሻ ቢታ ማላ
ጎዬታና፤
ዬሩሳላሜይካ ቆሌቲዳ
ኬ ዶሬ ጊዳና፤
ጾሳ ኬይ ዲዛ ዙማይካ
ሻራፋ ማታይ ኢዛ ቦላ
ዲጪዳ ዙማ ጊዳና።1
Source notes (1)
- Cross-reference ኤር 26፡18
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.