ማቶሳ ሚሺራቾ

ማቶሲ ጻፊዳ

ኑ ጎዳ ዬሱስ ኪርስቶሳ ሚሺራቾ ቃላ

ጊዶ ቆፋ

ማቶሳ ሚሺራቾ ቃላይ፥ ዬሱስ ኪርስቶሲ ቡሮፔ ያናይሳ ሲንሲዲ ኢዛ ጊሻስ ዮቴቲዳ ዴሬ ኣሻናዴይ ኢዛ ጊዲዳይሳኔ ጾሲ ካሴ ጋልኣ ጫቆ ማጻፋን ባ ዴሬዛስ ኢሚዳ ሂዶታ ቃላ ኩንዳይ ኢዛ ባጋራ ጊዲዳይሳ ዮቲዛ ሚሺራቾ ቃላራ ዴስ። ሄሲካ ሄ ሚሺራቾ ቃላይ፥ ዬሱስ ኪርስቶሲ ኢስታ ጊዶን ዬሌቲ ዲጪዳ ኣይሁዳ ኣሳስ ጻላላ ጊዶንታ ኣላሜ ኣሳስ ኩሜሳ።

ማቶሳ ሚሺራቾ ቃላይ፥ ዳሮፔ ናጌቴን ጊጌቲዳ ማጻፋ። ማጻፋዚ ኮይሮፔ ዬሱሳስ ዬሌታ ጊሻስ ዮቶ ዶሚዲ ኢዛ ጺንቃታ ጊሻሲኔ ኢዚ ፓጬቲዳ ፓጬዛ ሎኤ ዮቲዳፔ ጉዬ ኢዚ ጋሊላ ዴሬን ሳባኪዳይሳ፥ ታማርሲዳይሳኔ ኣሳ ሃርጌፌ ፓዳይሳ ቆንጪሴስ። ቃሴካ ዬሱሲ ጋሊላ ዴሬፔ ዬሩሳላሜ ቢዳይሳ፥ ኢዚ ሃይሳ ሃ ኣላሜዛ ቦላ ዴኢዳ ዴኦ ጊሻሲኔ ሃ ኣላሜዛ ቦላ ጋምኢዳ ዉርሴ ላይን ዉርሴ ሳሚንታን ሃኒዳ ሃኖታ ጊሻስ ዮቴስ። ሄይቲካ ዬሱሲ ካቄቲዳይሳ፥ ሃይቂዳይሳኔ ሃይቆፔ ዴንዲዳይሳ።

ሃ ሚሺራቾ ቃላዚ፥ ዬሱሲ ጾሳ ዎጋ ቢርሻናስ ኢዛስ ጎዳቴ ዲዛዴኔ ጾሳ ካዎቴ ጊሻስ ታማርሲዛ ጊታ ኣስታማሬ ሂስቲ ሺሼስ። ኢዛ ቲሚርቴዛፔ ዳሪዛ ባጋይ ኢቻሹ ዱማ ዱማ ኪፊሌን ሻኬቴስ።

1. ጾሳ ካዎቴን ዲዛይታ ሃኖ፥ ኢስታ ኦሶ፥ ኢስታ ሼኔ፥ ኢስቲ ሃናና ማላ ኢስታስ ቤሲዛዚኔ ኢስታስ ቤሲዛ ዉርሴ ኤጻ ሻኪ ኤሪሲዛ ዙማ ቦላ ሳባኪዳ ቃላ (ሼምፖ 5-7)

2. ታማኔ ናምኡ ኢዛ ኣሽካራቲ ሚሺራቾ ቃላ ዮታናስ ኪቴቲ ቢሺን ኢስታስ ኢሜቲዳ ዎጋታ (ሼምፖ 10)

3. ጾሳ ካዎቴ ጊሻስ ሺቂዳ ዱማ ዱማ ሌሚሶታ (ሼምፖ 13)

4. ዬሱሳ ዎስቲ ካላናኮን ኢስታስ ጌላና ማላ ኢሜቲዳ ቲሚርቴ (ሼምፖ 18)

5. ሃይሳ ሃ ዎዴዛ ዉርሴ ጊሻሲኔ ጾሳ ካዎቴይ ያናይሳ ጊሻስ ኢሜቲዳ ቲሚርቴ (ሼምፖ 24-25)

ሃ ማጻፋይ ኦይኪዳ ኩሜ ቆፋ

ዬሱስ ኪርስቶሳ ዬሌታ ዛርኬኔ ኢዛ ዬሌታ

ጻማቂዛ ዮሃኒሳ ኦሶ

ዬሱሳ ጻማቄቴኔ ኢዛ ፓጬቴ

ዬሱሲ ጋሊላን ኦሶ ዶሜ

ዬሱሲ ጋሊላፔ ዬሩሳላሜ ቡስ

ዉርሴ ሳሚንታን ዬሱሳ ጋኪዳ ሜቶታ

ዬሱሲ ሃይቆፔ ዴንዲ ቤቲዴስ