ኤርማሳ ዚላስ 5

ማሬታናስ ዎሲዳ ዎሳ

1ኣቤት ጎዳዉ!

ኑ ቦላ ጋኪዳይሳ ኔ ቆፓ፤

ኑ ካዉሻቴካ ጼላ።

2ኑ ቢታ ኣላጋቲ ላቲዳ፤

ኑ ኬካ

ባስ ዱሳሶ ኦዳ።

3ኑኒ ዪኦ ጊዲዶስ፤

ኑ ኣዬቲ ኣምኤታ ጊዲዳ።

4ኑኒ ኑ ሃ

ሚሻን ሻሚ ኡዪዶስ፤

ኑኒ ኑ ሚካ

ሻሚ ኤኪዶስ።

5ኑና ጎዲዛይቲ

ኑስ ጌዶን ኤቂዳ፤

ኬሂ ዳቡርዶስ፤

ሼምፖካ ዲጌቲዶስ።

6ኑኒ ካ ካላናስ ጊዲ

ኣሶሬ ኣሳታሲኔ

ጊብጼስ ኩሼ ኢሚዶስ።

7ኑ ኣዋቲ ናጋራ ኦዳ፤

ኑኒ ኢስታ ቂጻቴ ኤኪዶስ።

8ኣይሌቲ ኑና ሃሪዳ፤

ኢስታ ኩሼፔ ኑና ኬሲ

ኤካናይ ኦኒካ ዴና።

9ባዞን ዲዛ ኦላ ጋሶን

ኑኒ ኑ ሼምፖ

ኣ ኢሚዲ ካ ዴሚዶስ።

10ኮሻ ዳሮፔ

ዴንዲዳይሳን ሃርጊዶስ፤

ኑ ሜይካ

ሻላ ማላ ጊዲዴስ።

11ማጫሳታ ጺዮኔን ቱኒሲዳ፤

ጌላኦታካ ዩሁዳ ካታማታን

ዎልቃን ኦይኪ ካዉሺዳ።

12ዳናታ ካቂዳ፤

ጪማታካ ቦንቺቤቴና።

13ዬላጋ ኣቱማ ናይቲ

ዎጻን ጋጫና ማላ

ዎልቃዳ፤

ፓንቲ ዴጾ ሚ

ቶኪዲ ጋዲጋዲዳ።

14ጪማቲ ፒርዳናስ

ኡቲዛ ዱቡሻ ኣጊዳ፤

ፓንቲካ

ባንታ ማዛሙሬ ኣጊዳ።

15ኡፋይሲ ኑ ዎዚናፔ ይዴስ፤

ኑ ዱሪሲካ

ዬሆን ላሜቲዴስ።

16ካላቻይ ኑ ሁኤፔ ኩንዲዴስ፤

ኑ ናጋራ ኦዳ ጊሻስ

ኣዬ ኣና!

17ሄሳ ጋሶን

ኑ ዎዚናይ ዳቡርዴስ፤

ኑ ኣይፌይካ ባልጁሚዴስ።

18ጺዮኔ ቢታይ ቡላ ጊዲዳ ጊሻስ

ዎራካናቲ ጉፒዛሶሆ ጊዲዴስ።

19ኣቤት ጎዳዉ!

ኔኒ ሜርናስ ሃራሳ፤

ኔ ካዎቴይ ዬሌታፔ

ዬሌታ ጋካናስ ዳና።

20ኔ ኑና ኣይስ ኡባ ዎዴ

ጮኡ ጋይ?

ቃሴ ኣይስ

ሃይሳ ጋካናስ ኣጋጋዲ?

21ጎዳዉ! ኔኒ ኑና ኔኮ ዛራ፤

ኑኒካ ኔኮ ሲማና!

ቤኒ ኑ ቦንቾዛ ዛራዳ

ኑና ኦራ!

22ኔ ሄሳ ኦንታ ኣጊኮ

ኑና ሙሌራ ኣጋዲ?

ኔ ሃንቆዛስካ ዛዋይ ባዌ?