ኬሳ ማጻፋ 27

ጻርቂማላፔ ኦሴቲዳ ያርሾሶሆ

(ኬሳ 38፡1-7)

1«ኦዶሮ ሚፌ ያርሺዛሶ ኦ። ሄ ያርሺዛሶዛ ቃቴይ ሄ ዋ፤ ጎምፓይኔ ኣዱሳቴይ ኢሲ ማላ፥ ኢቻሹ ኢቻሹ ዋ ጊዲዲ ኦይዱ ዞዜራ ዴዮ። 2ኦይዱ ዞዜታ ዉርሴ ጋጻን ጋጻን ኢሲ ኢሲ ካጬ ሜ፤ ካጬቲ ያርሾሶዛፔ ኦሴቴቶ። ሂስታዳ ያርሺዛሶዛ ጻርቂማላ ቲያ። 3ኢዛን ጎኤቲዛ ሚሻታ፥ ቢዲን ካሺዛ ሚሻታ፥ ካሼቲዳ ቢዲን ኬሲዛ ሚሻታ፥ ኬሬታ፥ ኣሾ ጺጺዛ ኮንጬታኔ ታማ ካቺዛኔ ኬሲዛ ሚሻታ ኡባ ጻርቂማላፔ ኦ። 4ሂስታዳ ኢዛስ ጻርቂማላፔ ዛይዛሬ ማላ ሚሺኔ ኦይዱ ጉላታ ቦላን ኦይዱ ሳጋዮታ ኦ። 5ሂስታዳ ያርሺዛሶዛስ ዳባ ቦላ ዎ። 6ኦዶሮ ሚፌ ያርሺዛሶዛስ ቶሆ ሚታ ኬሳዳ ጻርቂማላ ቲያ። 7ያርሺዛሶዛ ቶኪዛ ዎዴ ማዳና ማላ ሄ ቶሆ ሚታስ ናምኡ ሚሌራ ዲዛ ሳጋዮታን ኣ። 8ታኒ ኔና ዙማ ቦላን ቤሲዳ ማላ ያርሺዛሶዛ ሳንቃፌ ኦዳ ጊዶዛ ዶያ ኣጋ።

ጾሳ ዱንካኔዛ ጊቤ

(ኬሳ 38፡9-20)

9«ጾሳ ዱንካኔዛ ጊቤ ሎኢ ዳዴቲዳ ሊቆ ላይኖፔ ማጋላሻታ ጊጊሳ። ዱጌ ባጋራ ዲዛ ማጋላሻታ ኣዱሳቴይ ጼቱ ዋ ጊዶ። 10ኢዛስ ናምኡ ታሙ ኤቆ ሚቲኔ ኤቆ ሚቲ ኢስታን ኤቂዛ ናምኡ ታሙ ኤቆሶታ ጻርቂማላፔ ኦ፤ ኢስታ ሁኤን ቃሴ ካቆታኔ ቶሬ ሚታ ሁኤ ቦላ ጊታ ሳጋዮታ ቢራፔ ኦ። 11ሄሳካ ፑዴ ባጋ ኣዱሳቴይ ጼቱ ዋ፤ ቃሴ ናምኡ ታሙ ቶሬ ሚቲኔ ኤቆ ሚታስ ናምኡ ታሙ ጻርቂማላፔ ኦሴቲዳ ኤቆሶቲ ዴቶ። ሂስታዳ ቢራፔ ኦሴቲዳ ካቆታኔ ኤቆ ሚታስ ሁኤ ቦላ ጊታ ሳጋዮታ ዎ። 12ኣርሼይ ዉሊዛ ባጋራ ኣኮቴይ ኢቻሹ ታሙ ዋ ጊዶ፤ ታሙ ቶሬ ሚቲኔ ቶሬ ሚታስ ታሙ ኤቆሶቲ ዲዛ ማጋላሻቲ ኢዛስ ዴቶ። 13ቃሴ ኣርሼይ ሞኪዛ ባጋራ ኣኮቴይ ኢቻሹ ታሙ ዋ ጊዲዲ፥ 14ፔንጌዛፔ ኢሲ ባጋራ ታማኔ ኢቻሹ ዋ ኣዱቂዛ ማጋላሻቲ ዴቶ፤ ኢስታስ ሄ ኤቆ ሚቲኔ ኢስታን ኤቂዛ ሄ ኤቆሶቲ ዴቶ። 15ሄሳካ ሃንኮ ባጋራ ታማኔ ኢቻሹ ዋ ኣዱቂዛ ማጋላሻቲ ዴቶ፤ ኢስታስ ሄ ኤቆ ሚቲኔ ኢስታን ኤቂዛ ሄ ኤቆሶቲ ዴቶ።

16«ፔንጌዛስ ናምኡ ታሙ ዋ ኣዱቂዛ ማጋላሻ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሎኢ ሱቄቲዳ ላይኖፔ ዳዴቲዳ፥ ጺልፔን ሎኢዳ ማጋላሻ ጊጊሳ። ኢዛ ቱቂ ኦይካናስ ኦይዱ ኤቆ ሚቲኔ ቶሬ ሚቲ ኢስታን ኤቂዛ ኦይዱ ኤቆሶታ ጊጊሳ።

17«ጊቤዛ ዩዪ ኣናስ ዲዛ ኤቆ ሚታ ኡባስ ቢራፔ ኦሴቲዳ ጊታ ሳጋዮቲ፥ ካቆቲኔ ጻርቂማላፔ ኦሴቲዳ ኤቆሶቲ ዴቶ። 18ጊቤዛ ኣዱሳቴይ ጼቱ ዋ፥ ኣኮቴይ ኢቻሽ ታሙ ዋ ጊዶ፤ ቃቴይ ኢቻሹ ዋ ጊዲዳ ሎኢ ሱቄቲ ዳዴቲዳ ላይኖፔ ኦሴቲዳ ማጋላሻቲ ዴቶ፤ ቃሴካ ጻርቂማላፔ ኦሴቲዳ ኤቆሶቲ ዴቶ።

19«ጾሳ ዱንካኔዛ ኦሶስ ጎኤቲዛ ሚሻቲ፥ ዱንካኔዛኔ ጊቤዛ ቶሌ ሽኬቲ ዉሪካ ጻርቂማላፔ ኦሴቴቶ።

ጾምፔ ዛይቴ

(ሌዌ 24፡1-4)

20«ጾምፔይ ቶኦንታ ኤጺሼ ዳና ማላ ኢዛስ ኮሺዛ ዛይቴ ዎጋራ ሚ ኣይፌ ጫዲ ጉምኢዲ ጺሎ ዛይቴ ኔስ ኤሃና ማላ ኢስራኤሌ ናይታ ኣዛዛ። 21ኣሮኔይኔ ኢዛ ኣቱማ ናይቲ ጾምፔይ ጎዳ ሲንን ቃሚዳ ጋዴይ ዎንታና ጋካናስ ፖኣና ማላ፥ ጾሳ ዱንካኔዛ ጊዶን፥ ጫቆ ቃላስ ማርካይ ኢዛ ጊዶን ዲዛ ታቦታ ሲንን ዲዛ ማጋላሻፔ ካሬራ ኤቶ። ሃይሲ ኢስራኤሌ ኣሳስ ሜርናስ ዎጋ ጊዲ ዴኦ።