ኤፌሶኔ ኣሳስ

ጳዉሎሲ

ኤፌሶኔ ኣሳስ

ጻፊዳ ኪታ

ጊዶ ቆፋ

ጳዉሎሲ ኤፌሶኔ ኣሳስ ጻፊዳ ኪታይ ሃራፔካ ካሴቲዲ ኢዚ ሎኤ ጼሊዛይ፥ «ጾሳ ሼኔይ ፖሌታናይ ሳሎኒኔ ሳኣን ዲዛ ሜቴቲ ዉሪካ ኢሲፌ ኢሲ ኪርስቶሳ ጎዳቴ ጋርስ ኣዛ ዎዴይ ጋኪሺና» (1፡10) ጊዛ ቆፋ ቦላ። ቃሴካ ጎዳ ዬሱስ ኪርስቶሳ ኢሲፌቴን ኣሳ ዜሬ ዉሪካ ኢሲኖ ጊዳና ማላ ሃይሳ ጊታ ቆፋ ኦሶን ፔይሻና ማላ ጾሳ ዴሬዛ ቆፍሲዛዛ።

ኤፌሶኔ ኪታን ኮይሮ ኪፊሌዛ ጻፌዚ ኢሲፌቴ ጊሻስ ዶሚዲ ኣይፌ ዮኦዛ ኣሲዲ ጾሳ ኣዋይ ዴሬዛ ዎስቲ ዶሪዳኮ፥ ባ ናዛ ዬሱስ ኪርስቶሳ ባጋራ ኢስቲ ባ ናጋራፔ ማሮቴ ዴሚዲ ዋኒ ኣቲዳኮኔ ጾሳ ጊታ ሂዶታ ቃላይ ጺሎ ኣያና ባጋራ ዋኒ ቆንጪዳኮ ኤሪሴስ፤ ናምኣን ኪፊሌዛን ቃሴ ጻፌዚ ናባቢዛይቲ ኢሲፌቴ ዴኦን ኪርስቶሳን ኢስታስ ዲዛ ኢሲፌቴይ ቱሙ ጊዳና ማላ ኢስቲ ዋኒ ዋኒ ዴኣናኮ ኢስታ ቆፍሴስ።

ኣሳይ ኪርስቶሳን ዲዛ ኢሲፌቴን ኣይ ማላ ኢሲፌቴ ኢስታስ ዲዛኮ ዱማ ዱማ ሃሳያ ቆሞታን ቆንጪዴስ፤ ዎሳ ኬ ኪርስቶሳ ኣሳቴ ጊዲሺን ኪርስቶሲ ቃሴ ኣሳቴስ ሁኤ ማላ። ዎሳ ኬያ ጊምቤ ኬ ማላ ጊዲሺን ኪርስቶሲ ቃሴ ኬስ ጉላን ኡቲዛ ሹቻ ማላ፤ ዎሳ ኬያ ማቺ ማላ ጊዲሺን ኪርስቶሲ ቃሴ ኣዚና ማላ፤ ጻፌዚ ኪርስቶሳ ባጋራ ቆንጪዳ ጾሳ ኪያቴ ኬሂ ቂሲ ዮቲዛ ዎዴ ጪማቴ ዲዛ ቃላን ዮቴስ። ኡባ ሚሼካ ኢዚ ጼሊዛይ ኪርስቶሳ ሲቆን፥ ኢዛ ያርሼቴን፥ ኢዛ ማሮቴን፥ ኢዛ ኪያቴኒኔ ኢዛ ሳሮቴ ባጋራኮ!

ሃ ማጻፋይ ኦይኪዳ ኩሜ ቆፋ

ጌሎሶ

ኪርስቶሳኔ ዎሳ ኬ

ኪርስቶሳን ጊዲዳ ኦራ ዴኦ

ኩሻ ቆፋ