ኤራንቻታ ማጻፋ 11

ኣ ኤራንቻይ ኦና ቤሲዛ ኦሶ

1ኔ ካ ሃን ዬጋ፤

ዳሮ ጋላሳታፔ ጉዬ

ኔኒ ዛራ ዴማና።

2ኔስ ዲዛ ኣቆ ላፑን ዎይኮ

ኦስፑን ሶሆን

ሻኬሬ ዎ፤

ኣይስ ጊኮ ቢታ ቦላ

ኣይ ኢታይ ያናኮ ኔኒ ኤራካ።

3ሻራይ ካሬጺኮ

ቢታ ቦላ ኢራይ ቡኬስ።

ሚ ፑዴሃ ዎይኮ

ዱጌሃ ኩንዲኮ

ባ ኩንዲዳሶን ኢቺ ኣቴስ።

4ጫርኮ ሃኖታ ናጊዛይ ዜሬና፤

ቃሴ ሻራ ማሊዛይ

ባ ካ ሺሼና።

5ጫርኮይ ኣዋራ ቢዛኮ

ኢዛ ኦጌ ኤራካ፤

ቃሴ ሼምፖይ ዎይኮ ኣያናይ

ኣዪ ኡሎን ዲዛ ሜታ ጊዶን

ዋኒ ጌሊዛኮ ኔ ኤራካ።

ሄሳካ ኡባ

ሜዳ ጾሳ ኦሶ

ኔ ሻካ ኤራና ዳንዳያካ።

6ማላዶራ ኔ ዜሬ ዜራ፤

ኦማርሲካ ኔ ኩሼይ

ኦሶ ቢርሾፎ፤

ጋሶይካ ሃይሲ ዎይኮ ሄሲ፥

ዎይኮ ናምኣይ ሎኣናኮ፥

ዎይኮ ኣዋይሲ ኣይፋናኮ

ኔ ኤራካ።

ዬላጋቴን ኔና ሜዳይሳ ቆፓ

7ፖኦይ ሎኦ፤

ኣዋ ኣይፌ ቤኦይ

ኣይፌ ኡፋይሴስ።

8ኣሲ ኬሂ ኣዱሳ ላይ

ሃ ሳኣን ዴኢኮ

ሄ ኡባንካ ኡፋዬቶ።

ጊዶ ኣቲን ማ ጋላሳቲ

ዳሪዛ ጊሻስ ቆፖ፤

ቡሮ ያና ሚሺ

ኡባይካ ሃዳ።

9ሃይሶ ዬላጋዞ!

ኔ ናቴቴ

ላይን ኡፋዬታ፤

ኔ ናቴቴ ላይን

ኔ ዎዚናን ኡፋዬታ፤

ኔ ኣይፌይ ጼሊዳ ኡባኔ

ኔ ዎዚናይ ኣሞቲዳ ኡባ ፖላ፤

ጊዶ ኣቲን ኔ ኦዳ ኦሶ

ኡባ ጊሻስ ጾሲ

ኔና ፒርዳስ ሺሻናይሳ ኤራ።

10ሄሳ ጊሻስ ኔ ዎዚናፔ

ጬጬ ሃሳ፤

ኢታ ሚሺካ ኔፔ ዲጋ፤

ጋሶይካ ናቴቴኔ ዬላጋቴ

ኤሌ ኣና።