ኤራንቻታ ማጻፋ 1

ኡባይካ ሃዳ

1ሃይሲ ዳዊቴ ና

ዬሩሳላሜን ካዎቲዳ

ኤራንቻዛ ቃላ።

2ሄ ኤራንቻይ፥

«ኡባ ሚሺ ሃዳ፤

ሃዳፔካ ኣዳ ሃዳ፤

ኡባ ሚሺካ ሃዳ» ጌስ።

3ኣላሜ ቦላ ኣሳ ናይ

ዳቡርዛ ዳቡራ ኡባስ

ኣይ ዎይ ዲዜ?

4ዬሌታይ ኣ ቢሺን

ሃራ ዬሌታይ ዬስ፤

ጊዶ ኣቲን ቢታያ ሜርናስካ

ሚና ዴኣዉስ።

5ኣርሼይ ሞኬሲኔ ዉሌስ፤

ቃሴካ ባ ሞኪዛሶ ባናስ ኤሶቴስ።

6ጫርኮይ ዱጌሃ ባጋ ጫርኬስ፤

ሃራ ዎዴ ፑዴሃ ባጋ

ሲሜስ፤

ቃሴ ዩዪ ዩዪ ኣዲ

ባ ሎሲዳ ኦጌን ጌሌስ።

7ሻፋ ሃ ኡባይ

ቢዲ ኣባን ጌሌስ፤

ጊዶ ኣቲን ኣባይ ሙሌካ

ኩሚ ኤሬና፤

ሻፋ ሃቲ ካሴ ባ ዪዳሶ

ሲሚ ቤቴስ።

8ኣሲ ሃሳያናስ

ዳንዳይዛዛፔ ቦላራ

ዮኦቲ ኡባይ ሳሌዛዛ፤

ኣይፌይ ጼሊዲ ካሊ ኤሬና፤

ሃይካ ሲዪዲ፥

«ታስ ጊዲዴስ» ጊ ኤሬና።

9ካሴ ሃኒዳይ ሲሚ ኢዚ ሃናና፤

ቃሴ ሃኢ ሃኒሼ ዲዛይካ

ካሴ ሃኒዳይሳ።

ሄሳ ጊሻስ ሳሎ ጉፋንን

ኣይኮይካ ኦራ

ሚሺ ዴና።

10ኦኒካ፥ «ቤኢቴ!

ሃይሲ ኦራ ሚሻ» ጊኮ

ሄሲ ኦራ ሚሽ ጊዴና፤

ሄሲ ኑኒ ዬሌታናፔ

ካሴካ ዲዛ ሚሻ።

11ቤኒ ዎዴ ሃኒዳ ሃኖታ

ዛሪዲ ሃሳኢሲዛ

ሚሺ ዴና፤

ሲንፌ ያናይቲካ

ኢስታፌ ካሊ ያናይታን

ቆፌቴቴና።

ኤራንቻዚ ዴኦ ሎሴፔ ዴሚዳ ቲሚርቴ

12ታኒ ኤራንቻዚ ዬሩሳላሜን

ኢስራኤሌስ ካዎ ጊዳዳ ዴኣዲስ።

13ታኒ ሳሎ ጉፋንን ዲዛ ኡባ

ሻካ ኤራናሲኔ

ኣ ኤራቴን

ፒልጋ ጼላናስ

ታ ቆፋ ቃቻዲስ፤

ጾሲ ኣሳ ናይታ ቶሲዳ ቶሆይ

ኣይ ማላ ዴጾ!

14ሳሎ ጉፋንን ሃኒዳ ሃኖታ

ኡባ ታ ቤኣዲስ፤

ጊዶ ኣቲን ኡባይካ ሃዳ፤

ጫርኮ ኦይካና ዬዴዛ ማላ።

15ጌላቲዳ ሚሺ

ሲቲ ጋናዉ ዳንዳዬና፤

ቃሴ ባይንዳ ሚሺ

ቆዴታና ዳንዳዬና።

16ታኒካ ታ ዎዚናን፥ «ታፔ ካሴ ዬሩሳላሜ ሃሪዳ ኡባታፔ ታኒ ጊታኔ ኣ ኤራንቻ ጊዳዲስ፤ ታኒ ኣ ኤራቴኒኔ ኤራን ኬሃ ሎሃዲስ» ጋ ቆፓዲስ።1 17ቃሴ ታኒ ኣ ኤራቴ፥ ጎሻቴኔ ኤያቴ ሻካ ኤራናስ ኬሃ ባጼታዲስ፤ ጊዶ ኣቲን ዉርሴን ሄሲካ ጫርኮ ኦይካናስ ዬዴዛ ማላ ሃዳ ጊዲዳይሳ ኤራዲስ።

18ኣ ኤራቴ ዳሪሺን

ጬጬይ ዳሬስ፤

ኤራይ ዳሪዛ ዎዴካ

ሜቶይ ዳሬስ።