ቆላሲያሴ ኣሳስ

ጳዉሎሲ

ቆላሲያሴ ኣሳስ

ጻፊዳ ኪታ

ጊዶ ቆፋ

ሃይሲ ኪታዚ ጻፌቲዳይ ቄሪ ኢሲያን ዲዛ ኤፌሶኔ ካታማፔ ኣርሼይ ሞኪዛ ባጋራ ዲዛ ቆላሲያሴ ካታማን ዲዛ ዎሳ ኬሳ፤ ሂኖ ሄ ዎሳ ኬዮ ኤሲዳይ ጳዉሎሳ ጊዶንታ ኣጊኮካ ኢዛ ኦሮሜ ካዎቴ ጋርሳን ዲዛ ኢሲያን ዋና ካታማ ጊዲዳ ኤፌሶኔፔ ሚሺራቾ ቃላ ዮቲዛይታ ሄ ዬዲዳ ጊሻስ ቆላሲያሴስካ ኣላፌቴ ዴስ፤ ቆላሲያሴ ዎሳ ኬን፥ «ጾሳ ኤራናሲኔ ሙሌራ ኣቶቴ ዴማናስ ኢሲ ኢሲ ኣሲ ሁኤን ሁኤን ዎልቃማ ኣያናታሲኔ ጎዳታስ ጎይናናስ ኮሼስ» ጊዛ ዎርዶ ኣስታማሬቲ ዲዛይሳ ጳዉሎሲ ሲዪዴስ፤ ሄ ኣስታማሬቲ ታማርሲዛ ሃራ ዮቲ፥ «ኣሲ ዉሪካ ቃጻራ ዎጋስ ሃሬታናስ ቤሴስ፤ ካ ሙሳ ዎጋኔ ሃራ ዎጋታካ ናጋናስ ቤሴስ» ጊዲ ታማርሴቴስ።

ጳዉሎሲ ሃ ኪታዛ ጻፊዳይ ቱሙ ጊዲዳ ኣማኖ ቲሚርቴ ታማርዲ ሄ ዎርዶ ኣስታማሬታ ቲሚርቴዛ ዲጋናሳ፤ ኢዛ ማልታፔ ዋናቲዛይ፥ «ዬሱስ ኪርስቶሲ ኩሜ ኣቶቴ ኢሜስ፤ ሃንኮይቲ ኣማኒዛ ኣማኖይ ጊዲኮ ዬሱሳፔ ሃሴቴስ» ጊዛይሳ። ጾሲ ሃይሳ ኣላሜዛ ኪርስቶሳን ሜዴስ፤ ቃሴካ ጾሲ ሃ ኣላሜዛ ኪርስቶሳ ባጋራ ባኮ ዛሪ ኤሃና፤ ሃይሲ ኣላሜዚ ኣታናይ ኪርስቶሳ ዎዚናፔ ኣማኖን ጻላ። ሄሳን ኤቂዲ ጳዉሎሲ ሃይሲ ዎልቃማ ቲሚርቴይ ኣማኒዛይታ ዴኦን ዋኒ ዳናስ ኮሺዛኮ ቤሴስ።

ሃይሳ ሃ ኪታዛ ጳዉሎሳፔ ኤኪዲ ቆላሲያሴ ኣሳስ ጋናስ ኪቴቲዳ ቲቂቆሳራ ኢሲፌ ዲዛይ ኣናስሞሳ ጊዲዳይሳ ኤሮይ ማዲዛዛ። ጳዉሎሲ ሄ ኣናስሞሳ ጌቴቲዛ ኣይሌዛ ጊሻስ ፒልሞናስ ሃራ ኪታ ጻፊዴስ። ቆላሲያሴ ኪታ ጊዶን ዲዛ ቆፋይ ኤፌሶኔ ኪታራ ኣዳፌ ጋይቴስ፤ ናምኣይካ ኢሲ ዎዴን ጻፌቲዳ። ኢስታ ጊዶን ዲዛ ጊታ ዱማቴ ኤፌሶኔ ኪታን ጳዉሎሲ ኪርስቶሳ ዎሳ ኬ ሁኤ ኦዲ ሺሼስ፤ ቃሴ ቆላሲያሴ ኪታን ኪርስቶሳ ሜቴ ኡባስ ሁኤ ኦዲ ሺሼስ። ሃይሳ ኢዚ ኦዳይ ጾሲ ሜዳ ኪታንቻታስ ጎይኖይ ኤያቴ ጊዲዳይሳ ቤሳናሳ።

ሃ ማጻፋይ ኦይኪዳ ኩሜ ቆፋ

ጌሎሶ

ኪርስቶሳ ሃኖኔ ኢዛ ኦሶ

ኪርስቶሳን ዲዛ ኦራ ዴኦ

ኩሻ ቆፋ