ሃዋሬታ ኦሶ

ሃዋሬታ ኦሶ

ጊዶ ቆፋ

ሃዋሬታ ኦሶ ማጻፋዚ ሉቃሳ ሚሺራቾ ቃላፔ ካሊዛይሳ፤ ሃ ማጻፋዛስ ኣይፌ ቆፋይ ኮይሮ ዬሱሳ ካሊዛይቲ ጺሎ ኣያናይ ካሌን ኢዛ ጊሻስ ዮቲዛ ሚሺራቾ ቃላ፥ «ዬሩሳላሜን፥ ዩሁዳ ዴሬ ኡባን፥ ሳማሪያኒኔ ቢታ ጋጻ ጋካናስ» 1፡8 ሚሺራቾ ቃላ ኢስቲ ዎስቲ ኡባ ጋዳኮ ሄሳ ዮታናሳ፤ ማጻፋዚ ኣማኖይ ኣይሁዳታ ጋርሳን ዶሚዲ ኩሜ ኣላሜ ኣሳይ ኣማናና ጋካናስ ኢዚ ዋኒ ዋኒ ኣኪ ኣኪ ቢዳኮ ዮቲዛይሳ። ሃይሳ ማጻፋ ጻፊዳይሲ ኣማኒዛይቲ ኦሮሜ ካዎራ ኤቄታናስ ጋርሳራ ዮኦ ቃቺዛይታ ጊዶንታይሳኔ ኣማኒዛይታ ኣማኖይ ሃንኮ ኣይሁዳታ ኣማኖ ፖሎኮ ጋዛዝ ጊዲዳይሳ ኤሪሳናስ ዳሮ ባጼቲዴስ።

ሃዋሬታ ኦሶ ማጻፋይ ዬሱሳ ጊሻስ ሚሺራቾ ቃላይ ጋኪዛሶይ ዎዴን ዎዴን ኣኪ ኣኪ ቢዛይሳኔ ዎሳ ኬይ ሚኒ ጻጲዳይሳ ቤሲዛ ሄ ጊታ ኪፊሌታን ሻኬታናስ ዳንዳዬስ።

1. ኣማኒዛይታ ኣማኖይ ዬሱሲ ዴንዲዲ ፑዴ ሳሎ ቢዳፔ ጉዬ ዬሩሳላሜን ዶሚዴስ።

2. ኢስራኤሌ ዴሬ ኩሜ ጋኪዴስ።

3. ኦሮሜ ጉጂ ኤኪዲ ሜዲቴራኔ ኣባ ዩሾን ዲዛ ዴራ ጋካናስ ኦይኮይሳ ዮቴስ።

ሃዋሬታ ኦሶ ማጻፋን ኬሂ ቆንጪ ቤቲዛይ ጺሎ ኣያና ኦሶ ጊዲሺን ጴንጼቆስቴ ባኣሌ ጋላስ ዬሩሳላሜን ኣማኒዛ ኣሳ ቦላ ዎልቃራ ዎይሳ፥ ሄሳካ ሄ ማጻፋዛን ዮቴቲዳ ዮኦታን ኡባን ቆንጪዳ ማላ ጺሎ ኣያናይ ዎሳ ኬኔ ዎሳ ኬ ካሌዛይታ ካሌዳይሳኔ ሚንዳይሳ ጉጄስ። ቤኒ ዎዴ ዮቴቲዛ ኣማኖ ቃላይ ዱማ ዱማ ኦጌራ ሳባኬቲዴስ። ሃዋሬታ ኦሶ ማጻፋን ፖሌቲዳ ኦሶቲካ ኪታዚ ኣማኒዛይታ ዴኦኔ ኢስታ ኢሲፌቴን ዲዛ ዎልቃይ ኣይ ማላ ሚኖኮኔ ኤሪሴቴስ።

ሃ ማጻፋይ ኦይኪዳ ኩሜ ቆፋ

ማርካቴስ ጊጌቴ

ዬሩሳላሜን ዮቴቲዳ ማርካቴ

ዩሁዳኒኔ ሳማሪያን ዮቴቲዳ ማርካቴ

ጳዉሎሳ ሃዋሬቴ ኦሶ

ሚሺራቾ ቃላ ዮታናስ ጳዉሎሳስ ኮይሮ ቡስ

ዬሩሳላሜ ሺቆ

ሚሺራቾ ቃላ ዮታናስ ጳዉሎሳስ ናምኣን ቡስ

ሚሺራቾ ቃላ ዮታናስ ጳዉሎሳስ ሄን ቡስ

ዬሩሳላሜን፥ ቂሳሪያኒኔ ኦሮሜን ጳዉሎሳ ቃሼቴ