1ታሶሎንቄ ኣሳስ

ጳዉሎሲ

ታሶሎንቄ ኣሳስ

ጻፊዳ ኮይሮ ኪታ

ጊዶ ቆፋ

ታሶሎንቄይ ማቂዶኒያ ጌቴቲዛ ኦሮሜስ ዋና ካታማ። ጳዉሎሲ ታሶሎንቄ ዎሳ ኬዮ ኤሲዳይ ፒሊጲሲዮሴ ዬጊ ቢዳፔ ጉዬና። ሄራካ ኢሲ ኣጊና ኩሞንታ ዲሺን ኣይሁዳቲ ኢዚ ፒሊጲሲዮሴ ዬጊ ቢዳይሳ ሲዪዳ፤ ሄሳ ጊሻስ ጳዉሎሲ ኢስታስ ጻፊዳ ባ ኪታዛን ሚሺራቾ ቃላ ቃንራ ቆንጪሲዴስ። (1፡9-10) ኢስቲካ ኣይሁዳታ ኣማኖ ኤካናስ ማቲ ኡቲዳ ኣይዛቤቲ ጳዉሎሲ ዮቲዛ ኣማኖን ዎዚና ቦሼቲዳ። ሄሳ ጊሻስ ኣይሁዳቲ ቃናቴቴን ጳዉሎሳ ቦላ ፓላማ ዴንዳ፤ ሄሳ ጊሻስ ጳዉሎሲ ታሶሎንቄ ዬጊዲ ጌዴ ቤሪያ ባናይሲ ኢዛስ ማኔ ጊዲዴስ። ጉ ጋምኢሼ ቆሮንቶሴ ካታማ ቢ ጋኪዳ ማላ ጺምቶሲ ዎሳ ኬይ ሃኒዛይሳ ዉርሲካ ኢዛስ ዮቲዴስ።

ጳዉሎሲ ኮይሮ ኪታ ታሶሎንቄ ኣሳስ ጻፊዳይ ኣማኒዛይታ ዴንናሲኔ ሚንናሳ፤ ኢዚ ኢስታ ሎኦ ኣማኖ ጊሻሲኔ ኢስታ ሲቆቴ ጊሻስ ሎኦ ዎሬ ሲዪዲ ጾስ ጋላቲዴስ። ካሴ ጳዉሎሲ ኢስታራ ዲዛ ዎዴ ኢዚ ኢስታራ ኣይ ማላ ዱስ ዴኢዳኮ ኢስታ ቆፍሴስ፤ ሄሳፌካ ኪርስቶሳስ ናምኣን ዩሳ ጊሻስ ዴንዲዳ ኦይሻታስ ዛሮ ኢሜስ።

ሄ ኦይሻታፔ ባጋይቲ፥ «ኪርስቶሲ ሃ ሲሚ ያናፔ ካሴቲዲ ካሴ ሃይቂዳ ኣማኒዛ ኣሳይ ኪርስቶሳ ዩሳን ቤቲዛ ሜርና ዴኦ ዴማኔ?» ጊዛይታ። ጳዉሎሲካ ሄሳ ጋሶ ሂስቲዲ፥ «ኪርስቶሳስ ናምኣን ዩሳ ቲሚርቴዛ ሂዶታን ናጊሼ ሄ ዎዴ ጋካናስ ጮኡ ጊዲ ኢንቴ ኦሶ ኦቴ» ጊዲ ኢስታ ዞሬስ።

ሃ ማጻፋይ ኦይኪዳ ኩሜ ቆፋ

ጌሎሶ

ጳዉሎሳ ኡፋይሲኔ ኢዛ ጋላታ

ኣማኒዛ ኣሳይ ካላና ዎጋ

ኪርስቶሲ ናምኣን ያና ዩሳ ጊሻስ ኢሜቲዳ ቲሚርቴ

ዉርሴ ዞሬ

ኩሻ ቆፋ