1ዮሃኒሳ ኪታ

ዮሃኒሲ

ጻፊዳ ኮይሮ ኪታ

ጊዶ ቆፋ

ዮሃኒሲ ኮይሮ ዬዲዳ ኪታዛን ናምኡ ኣይፌ ዮቲ ዴቴስ፤ ሄይቲካ ሄ ኪታዛ ናባቢዛይታስ ጾሳራኔ ጾሳ ና ዬሱስ ኪርስቶሳራ ኢሲፌቴ ዴኣና ማላ ኢስታ ሚንናሲኔ ሄሳ ሄ ኢሲፌቴ ይሲዛ ዎርዶ ቲሚርቴፌ ኢስቲ ናጌታና ማላሳ። ሃይሲ ኪታይ ጻፌቲዛ ዎዴ ሄ ኣላሜዛ ቦላ ኬሂ ኢታ ዎርዶ ቲሚርቴይ ዴስ፤ ሄ ቲሚርቴዚካ ኢሲ ኢሲ ኣማኒዛ ኣሳታ ኣማኖፔ ካሬ ኬሲዴስ፤ ሄ ዎርዶ ኣስታማሬቲ ታማርሲዛ ኢታ ቲሚርቴይ 1. «ጾሲ ኣያና ኣላሜ ጻላ ሜዴስ። 2. ሃይሳ ሃ ኣላሜዛን ዲዛ ኣይፌን ቤቲዛ ሚሽ ኡባኔ ኑ ኣሳቴ ጾሲ ሜቤና፤ ሄሳ ጊሻስ ሄ ሜቴቲ ዉሪካ ኢታ ጻላ። 3. ሃይሲ ኣይፌን ቤቲዛ ኣላሜዚኔ ኑ ኣሳቴይ ኑ ኣያና ቆሃናሲኔ ቱኒሳናስ ዳንዳዬና።» ሄሳ ጉሲ፥ «ኮይሮ ጾሳፌ ዪዳ ዬሱሳስ ኣሳ ኣሳቴ ዴና፤ ቃሴካ ናምኣንራ ኢሳዴይ ሃራ ኣሳ ቦላ ናጋራ ኦኮኔ ኢዚ ሃራ ኣስ ኢጺኮ ሄሳዴ ኦሶዚ ኢዛ ኣያና ቆሃናሲኔ ቱኒሳናስ ዳንዳዬና» ጉሳ። ሄይቲ ሄ ኣስታማሬቲ፥ «ኣቶቴ ጉሲ ሃይሳ ኣላሜዛ ዱሳስ ቆፖንታ ኣጎ ኮሼስ» ጊ ታማርሴቴስ። ሄሳራካ ጋዲ፥ «ሎኦ ኦሶን ጊዲን ዎይኮ ኣሴ ሲቆይ ሙሌካ ኮሼና» ጊ ታማርሴቴስ።

ሄሳ ጊሻስ ዮሃኒሲ ባ ኪታን፥ «ሄሳ ዎርዶ ቲሚርቴይ ቱሙ ኣማኖ ቲሚርቴፌ ካሬ ጊዲዳይሳ ታማርሴስ፤ ሄሳ ሄ ቲሚርቴዛ ኢጾን ዬሱስ ኪርስቶሲ ኩሜራ ኣሴኮ፤ ዬሱሳን ኣማኒዛይቲኔ ጾስ ሲቂዛይቲ ዉሪካ ባ ጋርሳን ኢሶይ ኢሳራ ሲቄታናስ ቤሴስ» ጊዲ ኤሪሲዴስ። ቃሴካ ዬሱሲ ቱማፔ ኣሳ ኣሾ ማይኢዳይሳኔ ዬሌቲዳይሳ ካዲዛዴይ ጾሳፌ ዬሌቲቤና። (4፡2-3) ጎዳ ጾሳፌ ዬሌቶንታዴይ ቃሴ ጾሳፌ ጊዲዳዴ ሲቃናስ ዳንዳዬና፤ ጾሳፌ ዬሌቲዳዴይ ኡባ ዎዴ ናጋራን ዴኣናስ ዳንዳዬና። (3፡10)

ሃ ማጻፋይ ኦይኪዳ ኩሜ ቆፋ

ጌሎሶ

ፖኦኔ ማ

ጾሳ ናይታኔ ጻላኤ ናይታ

ቱማኔ ዎርዶ

ቱሙ ሲቆ

ጾኒዛ ኣማኖ