Gamo Full Bible Latin Version
Mazamure Maxaafa 26
Dawite Mazamure
Abeet GODAWU!
Tani suureteththaninne
sidhey baynda
nenan ammanetta
de7ida gishshas
ne taas pirda.
Abeet GODAWU! Tana paacca;
ta qanth pilgga;
ta wozina xeella;
Ays giikko ne siiqoy
ta sinththan dees;
tani ne tumateththa
ogen hemettays.
Tani baleththiza asatara
issife uttike;
lo7o misatiza
iitata maabaran gelikke.
Iita ooththiza asata issifeteththa
tani ixxays;
kofa asatara issife uttike.
Abeet GODAWU!
Tanan qohoy
bayndayssa bessanaas
ta kusheza meeccays;
histtada yarsho
yarshizasoza yuuyays.
Galata mazamure yexxays;
neni ooththida miish
ubbaaka yootays.
Abeet GODAWU!
Neni de7iza keeththanne
ne bonchchoy aqizasoho
tani dosays.
Tana nagaranchchatara
issife pirdofa;
as wodhizaytarakka issife
ta shemppo dhayssofa.
Istta kushen iita halchchoy dees;
qasse istta ushachcha kushey
matta7en kumides.
Tani gidikko borey baynda
duus days;
tana wozza;
taas qadhetta.
Ta tohoy dembason eqqides;
tani derey shiiqidason GODAA galatana.
Gamo Full Bible Latin Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.