Gamo Full Bible Latin Version
Mazamure Maxaafa 120
Pude Kezishe Yexxida Mazamure
Tani metotida wode GODAA xeygadis;
izikka taas koyides.1
Abeet GODAWU!
Wordotiza metershatappenne
cimmiza inxarsatappe
tana ashsha.
Intteno wordanchchatoo!
Izi inttena wosttanee?
hessafe hara intte bolla
ay ooththanee?
Izi inttena hoxe tooran caddana;
izi inttena
bonqo taman xuuggana.
Ta Mesheeke deraa giddon days;
Qeedaare dunkaanenkka
uttida gishshas
taas aayye ana!
Saroteth ixxiza asatara
tani daro wode de7adis.
Tani saro koyays;
gido attiin tani saro
haasayza wode
istti oosh koyeettes.
Source notes (1)
- Footnote Pude kezishe yexxida mazamure gizayssi Ibraawe deren asay Yerusalaame bishe yexxiza mazamure bessees.
Gamo Full Bible Latin Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.