Gamo Full Bible Latin Version
Mazamure Maxaafa 12
Dawiti Zammareta Kaabbos Osppun Shayan Waaxettida Diiththan Yexxida Mazamure
GODAWU! Lo7o asi biitta bollafe wurida gishshas
ne tana maaddarkki;
deraa giddon ammanettiza
asi deenna.
Issoy issaas wordo haasayees;
issoy issaa doonan cimmeettes;
Abeet GODAWU!
baleththiza doona gorda;
otoron haasayza
inxarsata qanxxa;
Istti, «Nuni nu inxarsan xoonana;
nu doonay nuussa;
nuus goday oonee?» geettes.
GODAY, «Hiyeesati un7ettida
gishshassinne,
metotanchchata waaso gishshas
ha7i tani dendana;
tani istti amottiza saroteththan
istta woththana» gees.
GODAA qaalay izan
walakay baynda muuruta;
cooce taman laappunto
paacetti geeyida bira mala.
Abeet GODAWU!
Neni nuna saroteththan naaga;
ha woden diza iita yeletappe
mernaas ne nuna ashsha.
Asaa giddon iitay
bonchchettida wode
geellati ubba wode
otoreteththan simeretteettes.
Gamo Full Bible Latin Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.