Gamo Full Bible Latin Version
Mazamure Maxaafa 114
Isra7eele asay
Gibxe biittafe kezida wode,
Yaaqoobe zereththay
allaga qaala haasayza biittafe
yeggidi bida wode,1
Yuhuda asay Xoossas
geeshsha as gidides;
Isra7eele asaykka
izas haarettides.
Zo7o abbay hessa be7idi baqatides;
Yordaanoose shaafaykka
guye simmides.2
Zumati dharsho mala guferettida;
zumbullatikka
dorsa laaqqa mala xikkida.
Abbazoo! Ne ays baqatadii?
Yordaanoose shaafazoo!
Ays guye simmadii?
Intteno zumatoo!
Dharsho mala ays guppidetii?
Intteno zumbullatoo!
Dorsa laaqqa mala ays xikkidetii?
Hanne biittayee! Godaa sinththan
Yaaqoobe Xoossa
sinththan kokkora.
Izi zaalla eele haath kessides;
wolqqama zaalla pultto haath kessides.3
Source notes (3)
- Cross-reference Kessa 12:51
- Cross-reference Kessa 14:21; Iya 3:16
- Cross-reference Kessa 17:1-7; Tay 20:2-13
Gamo Full Bible Latin Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.