Gamo Full Bible Ethiopic Version
ዬ ማጻፋ 84:11
Verse 11 is marked below, with the whole chapter around it. Read from the start
ቆሬ ናይቲ ዛማሬታ ካቦስ ሱሱልኤን ዬጺዳ ማዛሙሬ
ኣቤት ሜቴ ጎዳዉ!
ኔኒ ዴኢዛሶይ ኣይ ማላ ሎኦሶ!
ታኒ ጎዳ ኬ
ዛጎ ላሞታይስ፤
ታኒ ኩሜ ዎዚናፔ
ዴኦ ጾሳስ
ኡፋይሳን ዬጻይስ።
ኣቤት ኡባፌ
ዎልቃማ ጎዳዉ!
ታ ካዎዞ ጾሳዉ!
ኔስ ያርሾ ያርሺዛሶዛ ማታን
ሲኔ ካፎይ ባስ
ዴኢዛሶ ዴማዱስ።
ሃራጴያካ
ባስ ዬሊዛሶ ኬጻዱስ።
ኔ ኬን ዴኢዛይቲኔ
ሜርናስ ኔና ሳቢዛይቲ
ኣንጄቲዳይታ።
ባንታስ ኔና ዎልቃ ኦዛይቲ፥
ጺዮኔ ኦጌ ባ ዎዚናን
ኣሞቲዛይቲ ኣንጄቲዳይታ።
ባካ ጌቴቲዛ ሃ ባይንዳ
ሻፋራ ኢስቲ ካንዛ ዎዴ
ሄ ሶሆን ፑልቶይ ቃና፤
ባሳ ኢራይካ ቡኪዲ
ቢታ ካልሳና።1
ኢስቲ ዎልቃ ቦላ ዎልቃ
ጉጂ ጉጂ ባና፤
ኢስቲ ጾሳ ሲንን
ጺዮኔን ቤታና።
ኣቤት ኡባፌ
ዎልቃማ ጎዳዉ!
ታ ዎሳ ኔኒ ሲያ።
ኣቤት ያቆቤ ጾሳዉ!
ታ ጊዛዝ ኤዝጋ።
ኣቤት ጾሳዉ!
ኔኒ ዶራ ቲይዳ
ኑ ካዎዛ ኣንጃ፤
ኢዚ ኑስ ጎንዳሌ ጊዲዳ ጊሻስ
ኔ ኢዛ ጼላ።
ሃራሶን ሺ ጋላስ ዴኣናፔ
ጾሳ ኬን
ኢሲ ጋላስ ዱሲ ሎኦ፤
ኢታታ ዱንካኔን ዳናፔ
ጾሳ ኬ ዛጎን
ዛቤ ጊዴ ታስ ሎኦ።
ጎዳይ ኑስ ኣርሼኔ ጎንዳሌ፤
ኢዚ ኣዮቴኒኔ
ቦንቾን ኑና ናጌስ፤
ሱሬቴን ሄሜቲዛይታ
ኢዚ ሎኦ ሚሽ ዲጌና።
ኣቤት ኡባፌ
ዎልቃማ ጎዳዉ!
ኔናን ኣማኔቲዛይቲ
ኣንጄቲዳይታ።
Source notes (1)
- Footnote ባካ ጊዛይሳ ዱማ ዱማ ጌሻ ማጻፋቲ ዬሆ ሾባ ጌቴስ።
Gamo Full Bible Ethiopic Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.