Gamo Full Bible Ethiopic Version
ዬ ማጻፋ 139:14
Verse 14 is marked below, with the whole chapter around it. Read from the start
ዳዊቲ ዛማሬታ ካቦስ ዬጺዳ ማዛሙሬ
ኣቤት ጎዳዉ!
ኔኒ ታና ፒልጋ ኤራዳሳ።
ታኒ ኣዉዴ ኡቲዛኮኔ
ኣዉዴ ኤቂዛኮ ኔኒ ኤራሳ፤
ኔኒ ታ ቆፋ ኡባ
ሃኮፔ ኣኬካሳ።
ታኒ ቢዛሶኔ
ሼምፒዛሶ ጾሞሳሳ፤
ታ ኦጌታ ኡባ ኔኒ ኤራሳ።
ኣቤት ጎዳዉ!
ታኒ ታ ዶናፔ ኢሲ ቃላካ
ሃሳያናፔ ካሴታዳ
ኔኒ ታ ቆፋ ኡባ ኤራሳ።
ኔኒ ታ ዩሾ ኡባን ዳሳ፤
ኔ ኩሼዛን ታና ናጋሳ።
ኔ ኤራቴይ
ታና ኬሂፔ ማላሊሴስ፤
ታኒ ኣኬካናስ
ዳንዳይዛይሳፌካ ቄስ።
ታኒ ኔ ኣያናፔ
ኣዋ ባናስ ዳንዳያዚና?
ዎይኮ ኔ ሲንፌ
ኣዋ ባቃታናስ ዳንዳያዚና?
ፑዴ ሳሎ ኬኢኮ
ኔኒ ሄን ዳሳ!
ዱጌ ሲኦሌ ዎኮካ
ኔኒ ሄን ዳሳ።
ኣርሼይ ሞኪዛሶ ባጋ
ፓላ ቢኮ፥
ዎይኮ ኣርሼይ ዉሊዛሶ ባጋ
ሃካ ቢኮ፥
ታና ሄን ኔ ኩሼይ ካሌስ፤
ኔ ኡሻቻ ኩሼይካ
ታና ሚን ኦይኬስ።
ታኒ፥ «ማዞ!
ታና ጌን፤
ፖኦዞ! ታ ዩሾን
ማ» ጊኮ፥
ማይ ኔና ጼሎ ዲጌና፤
ኦማርሲ ኔስ
ጋላሳ ማላ ፖኤስ፤
ማይኔ ፖኦይ ኔስ ኢሲ ማላ።
ኔኒ ታ ኣሳቴ
ኡባ ሜዳሳ፤
ታ ኣዬይ ኡሎንካ
ታና ቲላ ሜዳሳ።
ኔኒ ታና ኬሂ ዬጋልኔ
ማላሊሲዛዝ ሂስታ
ሜዳ ጊሻስ
ታ ኔና ጋላታይስ፤
ኔ ኦሶቲ ማላሊሲዛይታ!
ታ ሼምፖያ
ሄሳ ኡባ ኤራዉስ።
ታኒ ጌማሶን ሜቲዳ ዎዴ
ታ ሜቄቲ
ኔፔ ጌሚቤቴና፤
ታኒ ታ ኣዬይ ኡሎን ጪማ ጊዶን
ሂላን ኦሴቲዛ ዎዴ፥
ታ ኣዪ ኡሎን ቡሮ ሱ ጊዳ
ታ ዲሺን ኔ ኣይፌቲ ቤኢዳ፤
ታ ላይታፔ ኢሶይኔ
ዶሜቶንታ ዲሺን
ታስ ኔኒ ባሪዳ ጋላሳቲ ኡባይ
ኔ ማዝጋባን ጻፌቲዳ።
ኣቤት ጾሳዉ!
ኔ ታስ ቆፒዛ ቆፋይ
ኣይ ማላ ሎኦ!
ኢዚካ ኣይ ኬና ጮራ!
ታኒ ኢዛ ቆዲኮ ኣጬፔካ ዳሮ፤
ታ ኢቻ ቤጊዛ ዎዴ
ሃኢካ ኔናራ ዴኣይስ።
ኣቤት ጾሳዉ!
ኔኒ ኢታታ ሲፊዳኮ ኣዜ ዲዛይ!
ሱ ጉሳና ሳሜቲዛ ኣሳቲ
ታፔ ሃኪቴ!
ኢስቲ ኔ ቦላ
ኢታ ሚሽ ሃሳዬቴስ፤
ኔ ሞርኬቲ
ኔ ሱን ሞሬቴስ።
ኣቤት ጎዳዉ!
ኔና ኢጺዛይታ
ታኒ ኢጺኪና?
ኔ ቦላ ዴንዲዛይታ
ታኒ ሃራሴቲኪና?
ታ ኢስታ ሙሌራ ኢጻይስ፤
ኢስታ ታኒ
ታ ሞርኬታ ማላ ቆዳይስ።
ኣቤት ጾሳዉ!
ታ ዎዚና ፒልጋዳ ኤራ፤
ታና ፓጫዳ ታ ጬጬ ቆፋካ
ሻካ ኤራ።
ኣኔ ታናን ኢታይ ዴኢኮ ጼላ፤
ሂስታዳ ሜርና ኦጌራ
ታና ካሌ።
Gamo Full Bible Ethiopic Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.