હિબ્રુઓને પત્ર 4:12

આરામા માય જાઅના

1યાહાટી પોરમેહેરાય આમહાન વાયદો કોઅયોહો કા આપા આરામા જાગામાય જાહું, તે આમહાન બોજ હાચવીન રા જોજે, કા તુમહેમાઅને કાદોબી જાંઆ ચ્યામાય જાઅના રોય નાંય જાય. 2કાહાકા જેહેકેન આમહાય ઈસુ ખ્રિસ્તા બારામાય હારી ખોબાર વોનાયા, તેહેકેનુજ ઈસરાયેલા લોકહાયબી આરામા જાગામાય જાઅના હારી ખોબાર વોનાયા, બાકી ચ્યાહાય યાવોય બોરહો નાંય કોઅયો, યાહાટી, તો સંદેશ ચ્યાહાહાટી નોકામ્યો આતો.

3યાહાટી આપા લોક જ્યા ચ્યે વાતવોય બોરહો કોઅતાહા જીં પોરમેહેરે આખ્યીહી, આરામા જાગામાય જાય હોકી, એને બીજહા બારામાય, પોરમેહેરે આખ્યાં, માયે મા ખીજવાનામાય કસમ ખાદી, કા ચ્યા મા આરામા જાગામાય નાંય જાય હોકી, બાકી આમા જાંઅજેહે કા ઓ આરામા જાગો જો આમી તાં હેય, તો દુનિયા બોનાડ્યા ચ્યા સમયાથીજ આતો. 4કાહાકા હાતમા દિહા બારામાય પોરમેહેરાય પવિત્રશાસ્ત્રમાય એહેકેન આખલા હેય, પોરમેહેરાય હાતમે દિહી પોતાના બોદા કામહાલ પુરાં કોઇન આરામ કોઅયો. 5આમા ઇબી વાચજેહે કા ચ્યાય પાછે આખ્યાં, ચ્યે મા આરામા જાગામાય નાંય જાય હોકી.

6ઈસરાયેલા ચ્યા લોક, જ્યાહા વોચમાય પેલ્લીવાર હારી ખોબારે ઘોષણા કોઅલી ગીયેલ, ચ્યે આરામા જાઅનામાય જાય નાંય હોક્યે કાહાકા ચ્યાહાય પોરમેહેરા આગના નાંય માની, બાકી લોકહાન ચ્યા આરામા જાગામાય જાંહાટી આમીબી મોકો હેય. 7ચ્યાહાટી પોરમેહેરે પોતાના આરામા જાગામાય જાંઅનાહાટી યોક આજુ સમય નોક્કી કોઅયો, એને તો સમય આજે હેય. આપહે વડીલાહા વિદ્રોહા કોલહાક વોરહા પાછે, ચ્યાય દાઉદથી યા વચનાહા ઘોષણા કોઆડી, જ્યેં પેલ્લેથીજ આખલે આતેં, “આજે જોવે તુમા પોરમેહેરા આવાજ વોનાતેહે, તે ચ્યા આગના પાળના મોનાય મા કોઅહા.”

8એને જોવે યહોશુવા ઈસરાયેલ લોકહા અગુવાઈ કોઇન ચ્યાહાન ચ્યા આરામા જાગામાય લી જાય હોકતો, તે ચ્યા પાછે પોરમેહેર યોક બિજા દિહા વાત નાંય કોઅતો. 9યાહાટી જાંઆય લા કા પોરમેહેરા લોકહાહાટી આજુ યોક જાગો તિયાર હેય, જાં ચ્યે પુરી રીતીકોય આરામ કોઇ હોકતેહેં, ચ્યે ચ્યેજ રીતીકોય આરામા કોઇ હોકતેહેં જેહેકેન પોરમેહેરે હાતમે દિહી આરામ કોઅયેલ. 10કાહાકા જીં કાદાં માઅહું આરામા જાગાવોય જાહાય, તે તો પોતાના કામ પુરાં કોઅયા પાછે આરામ કોઅરી, જેહેકેન પોરમેહેરે પોતાના કામ પુરાં કોઅયા પાછે આરામ કોઅયેલ. 11યાહાટી આમા ચ્યા આરામા જાગામાય જાંહાટી પુરી ઇંમાતથી કોશિશ કોઅતે, કાય એહેકેન નાંય ઓએ, કા ચ્યા લોકહા હારકા આપા પોરમેહેરા આગના નાંય પાળવાથી ચ્યા જાગામાય જાંહાટી રોય જાજે.

12કાહાકા પોરમેહેરા વચન જીવતા, પ્રબળ, એને કોઅહાબી બેન દાઅયેવાળી તારવાયે કોઅતા ચીંદળા હેય, તી જીવ એને આત્મા, એને હાંદા એને આડકાહા લોગુ ઉંડે ઉતી જાહે, એને આમહે મોના ઇચ્છાયો એને વિચારાહાન પારખેહે. 13એને દુનિયા કોઅહાબી જોનાવર પોરમેહેરાથી દુબલાં નાંય હેય, ચ્યા હામ્મે બોદ્યોજ વસ્તુ ખુલ્લ્યો એને પ્રગટ હેય બાકી તો તોજ હેય જ્યાલ આપહે ઇસાબ દાં પોડી.

આમહે મહાન મહાયાજક

14યાહાટી, ઈસુ જો હોરગામાય ગીયહો, તો પોરમેહેરા પોહો હેય, તો આમે બોદહા મોઠો મહાયાજક હેય, યાહાટી યા આમા ચ્યા બોરહાલ છોડયા વોગાર ચ્યામાયજ મજબુત બોની રોહુ, જ્યેથી આમહાય બોદહા હામ્મે કોબુલ કોઅયેલ. 15આમહે મહાયાજક, જો ઈસુ ખ્રિસ્ત હેય, તો આમહે બોદી કમજોરયેમાય મોદાત કોઅહે, કાહાકા ચ્યાય આપહે હારકા બોદ્યેજ જાત્યે પરીક્ષાયે સામનો કોઅયો બાકી તેરુંબી કાય પાપ નાંય કોઅયા. 16યાહાટી યા આપા ઇંમાતથી પોરમેહેરા પાહાય યેતે, જો મોયાથી બોઆલો હેય, કા આપા ચ્યા દોયા મેળાવતા એને તી સદા મોયા મેળવા, જીં જરુરી સમયે આપહે મોદાત કોઅરી.