ગલાતીઓને પત્ર 1

સલામ

1આંય પાઉલ ઈસુ ખ્રિસ્તા પ્રેષિત હેતાંવ, માન પ્રેષિત ઓઅરાહાટી લોકહા કોઅહાબી ટોળા કા કાદાબી માઅહાકોય નાંય નેમ્યો, બાકી ઈસુ ખ્રિસ્તાકોય એને પોરમેહેર આબા કોય જ્યાંય ઈસુલ મોઅલા માઅને પાછો જીવતો કોઅયો, ચ્યાય માન નિવડયોહો. 2એને બોદા વિસ્વાસી બાહાહા આરે, જ્યા મા આરે હેય, ઈ પત્ર આંય ગલાતીયા વિસ્તારમાય રોનારા વિસ્વાસી લોકહા મંડળીલ લોખી રિઅલો હેય.

3આંય પ્રાર્થના કોઅતાહાંવ કા આમહે પોરમેહેર આબો એને પ્રભુ ઈસુ ખ્રિસ્ત તુમહાન સદા મોયા એને શાંતી દેય. 4આમહે પાપા લીદે પોરમેહેર એને આબા ઇચ્છાકોય ઈસુ ખ્રિસ્તાય પોતાલ આમે પાપહાહાટી બલિદાન કોઅય દેના જેથી આપા યા ચાલુ સમાયામાય દુનિયા લોકહા ખારાબ પ્રભાવાકોય બોચાવે. 5આંય પ્રાર્થના કોઅતાહાંવ કા લોક સાદામાટે પોરમેહેરા મહિમા કોઅતા રોય. આમેન.

યોકુજ હારી ખોબાર હેય

6આંય તુમહેથી નિરાશ હેતાંવ, કાહાકા પોરમેહેરાય તુમહાન ખ્રિસ્તાકોય સદા મોયામાય રાંહાટી હાદ્યા. ચ્યાલ તુમા ઓલે જલદ્યા છોડીન યોક આલાગ ખોબાર સ્વીકાર કોઅરા લાગ્યા. 7કેવળ યોકુજ હારી ખોબાર હેય, બાકી કોલહાક લોક ખ્રિસ્તા બારામાય હારી ખોબારેલ બોગાડા માગતાહા એને તુમહાન ભરમાવા માગતાહા.

8બાકી જો આમહા માઅને યોકતા માઅહું, કા હોરગામાઅને નિચે યેનલો યોક હોરગા દૂત બી ઈસુ ખ્રિસ્તા બારામાય હારી ખોબારેલ છોડીન જીં આમહાય તુમહાન આખી, કાદોબી યોક આલાગ શિક્ષણ તુમહાન દેય એને તી હારી ખોબાર હેય એહેકેન આખા માગે, તે પોરમેહેર ચ્યાલ સજા દેઅરી. 9જેહેકેન આમા પેલ્લા આખી ચુક્યાહા, તેહેકેન આંય આમી પાછો આખતાહાવ, ઈસુ ખ્રિસ્તા બારામાય હારી ખોબાર આખીહી ચ્ચેલ છોડીન, કાદોબી યોક આલાગ શિક્ષણ તુમહાન દેય એને તી હારી ખોબાર હેય એહેકેન આખા માગે, તે પોરમેહેર ચ્યાલ સજા દેઅરી. 10સાફ રીતીકોય, આંય લોકહાન ખુશ કોઅરા કોશિશ નાંય કોઉ, બાકી આંય પોરમેહેરાલ ખુશ કોઅરા માગહુ, જો આંય લોકહાન ખુશ કોઅરા કોશિશ કોઉ, તે પાછે ખ્રિસ્તા સેવક નાંય રોતો.

પ્રેષિત બોનાહાટી પાઉલા નિવડ

11ઓ વિસ્વાસી બાહાહાય, આંય તુમહાન જાણ કોઅય દેતહાવ, કા જી હારી ખોબાર માયે તુમહાન આખલી હેય, તી લોકહાય નાંય બોનાડીહી. 12માન ઈ હારી ખોબાર આગલ્યા ડાયહા પાઅને નાંય મિળી એને નાંય કાદા માઅહાય માન હિકાડી, બાકી ઈસુ ખ્રિસ્તાય માન હારી ખોબાર હોમજાંહાટી મોદાત કોઅયી.

13તુમા જાંઅતેહે કા પેલ્લા આંય યહૂદી ધર્મા નિયમાનુસાર જીવન જીવતો આતો, કા આંય પોરમેહેરાવોય બોરહો કોઅનારા લોકહા મંડળીલ સતાવતો આતો, એને ચ્ચાહાન માઆઇ ટાકાં કોશિશ કોઅતો આતો. 14એને આંય યહૂદી ધર્મા શિક્ષણા અભ્યાસ કોઅનામાય એને ચ્યાહા આગના પાળાહાટી મા ઉંબારે યહૂદી લોકહા કોઅતો આંય બોજ ઉસ્તુક આતો.

15બાકી પોરમેહેરા જોવે ઇચ્છા ઓઅયી કા માયેવોય ચ્યા પોહો ઈસુ ખ્રિસ્તાલ પ્રગટ કોએ કા આંય ગેર યહૂદી લોકહાન ખ્રિસ્તા હારી ખોબાર આખું, ચ્યાય મા જન્મો ઓઅના પેલ્લાજ માન નિવડી લેદો એને ચ્યા સદા મોયાકોય માન હાદ્યો. 16જોવે પોરમેહેરે પોતાના પોહો, ઈસુ ખ્રિસ્તાલ મા હામ્મે પ્રગટ કોઅયો, કા આંય ગેર યહૂદી લોકહાન ખ્રિસ્તા હારી ખોબાર આખું, માયે યા બારામાય કાદાવોઅને સલાહા નાંય લેદી. 17એને જ્યા મા કોઅતા પેલ્લા પ્રેષિત આતા ચ્યાહાથી સલાહા લાંહાટી આંય યેરૂસાલેમ શેહેરામાય નાંય ગીયો, બાકી તારાત અરબ દેશામાય ગીયો એને તાઅને પાછો દમસ્ક શેહેરામાય વોળી યેનો.

18એને તીન વોરહા પાછે આંય પ્રેષિત કેફાલ મિળાહાટી યેરૂસાલેમ શેહેરામાય ગીયો, એને ચ્યાઆરે પંદર દિહી રિયો. 19ચ્યે સમયે આંય કેવળ યોક પ્રેષિતાલ મિળ્યો, તો પ્રભુ બાહા યાકૂબ આતો. 20પોરમેહેર મા સાક્ષી હેય કા આંય જ્યો વાતો તુમહાન લોખતાહાવ, ચ્યો હાચ્યો હેય.

21પાછે આંય સિરીયા એને કિલિકિયા વિસ્તારામાય ગીયો. 22બાકી યહૂદીયા વિસ્તારાહા માઅને મંડળ્યેહે લોકહાય, જ્યા ખ્રિસ્તમાય હેય, માન કોવેજ નાંય દેખલો આતો. 23બાકી ચ્ચાહાય મા બારામાય કેવળ ઓલાહાંજ વોનાલે આતેં, કા યોક સમયે જો આપહાન સતાવતો આતો, તોજ આમી ખ્રિસ્તાવોય બોરહો કોઅના હારી ખોબારે બારામાય પ્રચાર કોઅહે, બાકી યા પેલ્લા તો ખ્રિસ્તાવોય બોરહો કોઅનારા લોકહાન નાશ કોઅરાહાટી કોશિશ કોઅય રિઅલો આતો. 24યાહાટી પોરમેહેરાય મા આરે જીં કોઅયા ચ્યા લીદે ચ્યે પોરમેહેરા મહિમા કોઅતે આતેં.