Yohanes

O Yesus Kristus Awi Jarita

O Yohanes walefo

O Singangasu ma Demo

Ma nonoma o buku manena isinako o Gikimoi Awi Demo ka sidutu ikakali gena o Yesus ḋabolo. De o buku ma demo, isilefo o gimina ma nonomaka, isingangasu o bi nonako ihahairani o Yesus waaaka ma ngale isikelelo Una magena o Salamati ma Kolano gena o Gikimoi ma Ngopa. De ma duuruka, kanaga o Jou Yesus dede o bi nyawa imatekebicara la o bi nonako ihahairani ma ngale gena Una wadoto so aku inasinako ngoneka. De o gimina magena lo isingangasu idodooha o nyawa yamuruo naga asa o Yesus iwipiricaya de idadi to Una Awi nyawa wimomote, de o nyawa ma binukali iholu Una iwipiricaya. So ma duuruka, gena o fasali 13-17 gena ma lefo sutu ikuru isingangasu, ma orasi o putu magena de asa Una witago de ma langino asa witooma, de kanaga Una dede Awi muri-muri manga rimoi ḋaloha so de to Una Awi demo aku wasidailako de wasiputuru onaka. O buku manena o fasali ma dodoguka (fasali 18-21) gena, isingangasu o Yesus witago, de o hakim ma simaka witailako, de wisidasangahadi sidago lo wisioho kali de lo womasimane kali Awi muri-murika.

O buku manena ma ngale ifofoloi gena o oho ka sidutu ikakali magena o Jou Gikimoi wonahike nakoso o Yesus Kristus powipiricayaka, de lo o oho magena upa ka o orasi ma simaka duma o orasi manena lo aku pamake. Bilasu popiricaya, o Yesus Una magena o ngeko o Gikimoika de o dodoto itotiai gena wonadoto la o nyawa aku powinako itiai, de Una lo o oho ma hutu (14:6). O buku manenaka gena wapake o bi ade-ade foloisi idala o wange isigeto-geto, la o hali moi-moi isidumu o kia bato igogou ma ngale o Jou Gikimoi Awi ngale o nyawaka, ena gena koloko o ake, o roti, o nita, o sowohi moi de awi duba-duba, de lo o anggur ma hutu de ma sopo.