Ibrani

O Surati

O Ibranika

Ma nyawa o Jou Yesus wipipiricaya

O Singangasu ma Demo

Ngone panakowa naguuna o surati manena walefo, sababu una awi ronga gena o surati ma rabaka walefowa. O kia naga panako itiai gena una naguuna o surati manena walelefo, una magena o bi nyawa ipipiricaya manga bobareta moi ona wadodoto de una wanako ḋaloha o Gikimoi Awi jaji iḋoḋoma, duma una gena o Jou Yesus Awi muri moi wisowo (2:3).

O surati wolelefo manena gena kanaga ma ngale ngai saange, ena gena wadoto onaka, la ona manga sininga wosiputuru, de lo ona wasisitiari. Una ona wadoto o piricaya o Yesus Kristuska gena foloisi ḋaloha de o Yahudika manga agama. O Yesus o Gikimoi ma Ngopa gena ifoloisi wolamo de o bi malaikat de lo ma nabi Musa (1:1-4, 1:13). De lo Una gena o Imam foloisi wolamo de o bi Yahudika manga imam-imam (4:14-7:28). De Una Awi Imam Wilalamo ma manara lo ifoloisi ḋaloha de lo wosidumu o Gikimoi Awi Jaji kiaka lo ifoloisi ḋaloloha (8:1-10:18).

O surati wolelefo manena gena to ona manga sininga wosiputuru la ona o Jou Yesus wimote ḋaputuru de lo o sangisara yomoku. To ona manga sininga wosiputuru la ona yobarani imasidate yahika o Gikimoika, sababu o Yesus gena o ngora wapelengaka ma ngale ona aku wimake (4:16, 6:20, 10:19-23). De lo to ona manga sininga wosiputuru la ona bilasu <<yogoge dede o Gikimoi>> yamake (3:10-4:11). Nako <<pogoge dede o Gikimoi>> gena, kanaga o nyawa itemo ma ngale nakoso ma orasi ngone o sorogaka, de nanga manara o dunia manenaka gena paaka kawa. Kanaga o nyawa ma binuka itemo ma ngale gena nakoso nanga oho pahike o Gikimoika de ka ka Una powipiricaya la ngone wonasisalamati, la nanga gogoho masirete gena popiricaya kawa.

O surati wolelefo manena gena ona wasitiari la ona upa imakiliho sidago manga piricaya o Jou Yesuska gena yodongosa (2:1-4, 3:7-19, 5:11-6:12, 10:26-39, 12:18-29).