Efesus

O Paulus awi Surati o Gogobu

O Efesuska

O Singangasu ma Demo

O surati manena ma rabaka, o Paulus wadoto ma ngale ona dede ma Kristus imarimoika so to Una Awi laha moi-moi gena ḋangodu wahike ḋaboloka (1:3). De lo o Paulus wadoto o Gikimoi Awi edekati ma ngale o bi moi-moi o kia kanaga o sorogaka de lo o duniaka gena, ḋangodu-ngodu asa wosirimoi de wosingosa ma Kristus Awi kuasa ma rabaka (1:10).

De o surati manena ma rabaka lo, kanaga o Paulus awi ade-ade ngai muruo naga wadoto ma ngale ona o gogobu de ma Kristus imarimoi so o nyawa ona yangodu lo idadi ka ka moi. Ena gena, o Jou Yesus Una womasitero maro o rohe ma sahe, de Awi nyawa ona wasitero maro o rohe ma bi bobolo (1:10, 1:22-23, 4:4, 4:15-16, 5:23-32). O Jou Yesus Una lo womasitero maro o tahu ma sosoḋe gena ma teto ilalamo moi, de Awi nyawa ona wasitero maro o tahu kiaka o Gikimoi wosigoko o sosoḋe magena ma ḋokuka (2:20-21). De o Jou Yesus Awi nyawa lo wasitero maro o bi prajurit o kudoti ma rabaka gena ona kanaga de manga daheka ma ngale o Iblis iwilawangi (6:10-18). De o moi-moi magena ma rabaka ḋangodu o Paulus wonasinako ngoneka ma ngale o Gikimoi Awi laha de Awi dodara gena wosifoloi ngoneka, so ngone gena aku Awi rimoi ma rabaka pogoge (1:6, 2:4, 4:3).